حوثیوں کا مزید دو بحری جہازوں کو نشانہ بنانے کا دعوی

بحیرہ احمر میں اپنے حملوں سے عالمی تجارت کو  خطرات سے دو چار کرنے والے یمن میں ایران کے حمایت یافتہ حوثی باغیوں نےدعویٰ کیا  ہے کہ انہوں نے ملک کے جنوب میں خلیج عدن میں دو امریکی بحری جہازوں کو نشانہ بنایا ہے۔

حوثی فوج کے ترجمان یحییٰ سیری نے کہا کہ "بحری فوجوں  نے غزہ کی پٹی میں فلسطینیوں کے خلاف ظلم اور محاصرے  سمیت  ہمارے ملک کے خلاف امریکہ اور برطانیہ کے  حملوں  کے  جواب میں خلیج عدن میں دو امریکی بحری جہازوں پر حملہ کیا۔"

یحییٰ سیری نے بتایا کہ  حملے کا نشانہ بنائے گئے  جہاز سی چمپین اور ماویس فورتونا تھے ۔

ایرانی حمایت یافتہ  حوثیوں نے   اسرائیل کے غزہ پر حملوں کے جواز میں 31 اکتوبر  کو یمن کے کھلے سمندر میں مبینہ طور پر  اسرائیلی فرموں سے تعلق ہونے والے تجارتی  بحری جہازوں پر قبضہ کرنے اور بعض پر  میزائلوں اورڈراونز سے حملوں کا سلسلہ شروع کیا تھا۔

حوثیوں کی کارروائیوں کے بعد، بہت سی شپنگ فرموں  نے بحیرہ احمر میں اپنی آمدورفت  کو روکنے کا فیصلہ کیا تھا۔

تقریباً 12 فیصد عالمی تجارت نہر سوئز کے ذریعے کی جاتی ہے، جو بحیرہ روم کو بحیرہ احمر سے جوڑتی ہے اور یورپ اور ایشیا کے درمیان مختصر ترین راستہ فراہم کرتی ہے۔

بحیرہ احمر کے بجائے کیپ آف گڈ ہوپ کے راستے کو استعمال کرنے پر ایشیا سے شمالی یورپ کے دو طرفہ سفر کے لیے اضافی 10 دن اور ایک  ملین ڈالر کا  اضافی ایندھن خرچ ہوتا ہے۔