صدرِ فلسطین کی اقوام متحدہ سے اسرائیل کو روکنے کی اپیل
"غزہ میں فلسطینی عوام کے خلاف اسرائیل کے حملے بند کیے جائیں، پورے غزہ سے اسرائیلی افواج کو نکالا جائے، اور اسرائیل کو غزہ پر قبضہ کرنے کی اجازت نہ دی جائے"
صدرِ فلسطین محمود عباس نے اقوام متحدہ سے مطالبہ کیا ہے کہ وہ غزہ کی پٹی پر جنگ کے خاتمے کے لیے بین الاقوامی کوششیں تیز کرے۔
فلسطینی خبر رساں ایجنسی وافا کے مطابق عباس نے یہ بیانات اسرائیل کے مقبوضہ مغربی کنارے کے شہر راملہ میں صدارتی مرکز میں اقوام متحدہ کے مشرق وسطیٰ امن مشن کے خصوصی کوآرڈینیٹر تور وینز لینڈ سے ملاقات کے بعد دیے۔
عباس نے اقوام متحدہ کے سکریٹری جنرل انتونیو گوٹیرس کو مخاطب کرتے ہوئے کہا کہ "غزہ میں فلسطینی عوام کے خلاف اسرائیل کے حملے بند کیے جائیں، پورے غزہ سے اسرائیلی افواج کو نکالا جائے، اور اسرائیل کو غزہ پر قبضہ کرنے کی اجازت نہ دی جائے"۔
گوٹریس سے 7 اکتوبر کو اسرائیل کی جانب سے غزہ میں شروع کی گئی جنگ کے خاتمے کے لیے اقوام متحدہ کے اقدامات اور ذاتی کوششوں کو تیز کرنے کا مطالبہ کرتے ہوئے، عباس نے "غزہ میں مشکل حالات میں فلسطینی عوام کے لیے انسانی امداد اور پناہ گاہوں کی فراہمی" کی اپیل کی۔
محمود عباس نے اس طرف توجہ مبذول کرائی کہ " غزہ کی پٹی اور مشرقی یروشلم سمیت مغربی کنارے سےکسی بھی فلسطینی کے بے گھر نہ ہونے اور اسرائیلی افواج کے تمام حملوں اور قابض افواج کی دہشت گردی کا خاتمہ کرنے کی کوششیں تیز کی جانی چاہییں ۔"
