أردوُغان بیرلشن میللتلر قوراماسیندا: قاراباغ آذربایجان ینگ توُپراغی‌دیر

تۆرکیأنینگ جمهورباشلیغی رجب طیب أردوُغان بیرلشن میللتلر قوراماسی نینگ 78-نجی عمومی ماصلاحاتیندا بیانات بردی.

تۆرک یوُلباشچی برن بیاناتیندا "قاراباغ آذربایجان ینگ توُپراغی‌دیر. موندان داشغاری یاغدای اۆچین باسیش اتمه‌ک آصلا قابول ادیلمِز" دیدی.

اینام و جبیسلیک ماضمونی بیلن باشلان 78-نجی عمومی ماصلاحاتینگ بۆتین آدامزادا حاییرلی بوُلماغینی آرزوو ادن أردوُغان دۆنیأدأکی دارتغینلیقلارا و دۆنیأنینگ ایقدیصادی تایدان گچیریأن قینچیلیقلارینا اۆن چکدی و گلوبال ترورچیلیق مسئله سی نینگ ده حالقارا حوُوپسوزلیغا اولی ضلل بریأندیگینی آیتدی.

تۆرکیه ده 2023-نجی ییلینگ 6-نجی فورالیندا بوُلان اولی یر تیتره مه سینی یاتلادان أردوُغان حالقارا جمغیتچیلیگه برن کؤمِک و قوُلداولاری سبأپلی مینتدارلیق بیلدیردی.

تۆرکیأنینگ جمهورباشلیغی موندان نأچه گۆن اوُزال لیبی ده بوُلان سیلینگ آغیر ضلللرینه اۆنس چکدی و تۆرکیأنینگ اینگ چالت یاغدایدا لیبیه کؤمِک برندیگینی نیغتاپ "لیبی دأکی دوُغانلاریمیزی یکه قوُیماریس" دیدی.

أردوُغان بیرلشن میللتلر قوراماسی نینگ حوُوپسوزلیق گنگه شینی ده تانقیت اتدی و "حوُوپسوزلیق گنگه شی 5 یوردونگ سیاسی استراتژیلی نینگ چاقنیشیان یری یاغدایینا گلدی" دیدی.

بیرلشن میللتلر قوراماسی نینگ شو ییلقی ماضمونی نینگ تۆرکیأنینگ ماقصاتلاری بیلن بیر بوُلاندیغینی آیدان أردوُغان تۆرکیأنینگ یۆزییلی گؤزیتیمینه اۆنس چکدی و "گلوبال عادالاتسیزلیقلاری یوُق اتجک، ایقدیصادی دنگسیزلیک بیلن گؤره‌شجک، پاراحاتچیلیق، حوُوپسوزلیق، دورنوقلیلیق و بایلیق اؤندۆرن تأثیرلی، گینگ مؤچبرلی و بشریتی اؤز ایچینه آلیان بۆتین انسانلیغینگ حاییرینا بوُلجاق بیر حالقارا سیستمینگ دۆیبۆنینگ توتولماغی باراسینداقی چاغیریشیمیز گیت گیده کؤپرأک یانگلانیار. بیزینگ آیدیشیمیز یالی دۆنیأ 5-دن اولیدیر. حوُوپسوزلیق گنگه شی ایندی دۆنیأنینگ حوُوپسوزلیغینی یرینه یتیرمه گینگ یرینه، 5 اۆلکأنینگ سیاسی استراتژیسی نینگ چاقنیشیان یری یاغدایینا گلندیر" دیدی.

رجب طیب أردوُغان "روسیا بیلن اوکراینانینگ ساواشی نینگ باشیندان بأری ساواشینگ ینگنی یوُقدیر، پاراحاتچیلیغینگ دا ینگیلنی یوريالدی دیدیک و هم روس هم ده اوکراینالی دوُستلاریمیزینگ مذاکره اتمه سی اۆچین تاغاللا ادیأریس. ساواشینگ اوکراینانینگ قاراشسیزلیغی و توُپراق بیتولیگی نینگ اساسیندا دیپلماسی و دیالوگ بیلن قوتاریلماغی اۆچین تاغاللامیزا دوُوام اتدیریأریس" دیدی.

تۆرک یوُلباشچی یر تیتره مه سی نینگ تۆرکیه ده 14 میلیون آداما ضلل برندیگینی و ایلایتا دا سوریأنینگ دمیرقازیق گۆن باتاری نینگ دا بو یر تیتره مه سی سبأپلی انسانی تایدان قین یاغدای دؤره دندیگینه اۆنس چکدی و تۆرکیأنینگ دمیرقازیق سوریه ده یاشایان 4 میلیوندان کؤپ آداما کؤمِک یتیرمأگه دوُوام اتجکدیگینی سؤزلرینه قوُشدی.

أردوُغان "بیر تاراپدان پ. ک. ک/ پ. ی. د ترور قوراماسی، بیله کی تاراپدان دا رادیکال توُپارلارینگ باسیشی نینگ آراسیندا قالان سوریه حالقی نینگ صابری تۆکه‌نیپ باریار" دیدی.

تۆرکیأنینگ جمهورباشلیغی عیراغینگ توُپراق بیتولیگینه اۆنس چکیپ داعش مسئله سی حاقیندا دا "باشلاری درده دۆشِنده داعش ینگ باهاناسی بیلن اوُیونلاری دا ایندی بیلیندی. من داعش بیلن اینگ اولی اورشی بوُلان، بو قوراما اینگ آغیر ییتگیلری چکدیرن یوردونگ یوُلباشچیسی حؤکمۆنده آچ آچان آیدیارین. سوریه و عیراق باشدا بوُلماق بیلن یاقین گۆن دوُغار، دمیرقازیق آفریقا و ساحل دأکی اؤز سیاسی و ایقدیصادی بأحبیتلری اۆچین داعش و شوُنگا منگزه ش قورامالاری اولانان ایکی یۆزلۆلردن ییگرندیک. بو یرلرده آصیل تهدیت دینگه داعش دألدیر. آصیل تهدیت باشغالاری اۆچین بوُلیان ساواشلاردا اولانیلان، یاشادیلان و اولالدیلان ترور قورامالاریدیر. باش بوُزار توُپارلار، پول اۆچین اورشان عسگرلر و کؤپ پول برنلر اۆچین ساواشانلارینگ بیر بؤله‌گی یرلیلردیر. بو حاقیقاتا قارامازدان دینگه سیاسی و ایقدیصادی پیدالاری اۆچین ترور قورامالاری بیلن بیله لیکده حرکت ادن یورتلارینگ ترورچیلیقدان و شیله مسئله لردن شکایت اتمأگه حاقی یوُقدیر" دیدی.

قبرس مسئله سی نینگ 60-نجی ییلی بوُلاندیغینی آیدان أردوُغان قبرس ینگ تۆرک تاراپی نینگ عادالاتلی و همیشه لیک بیر چؤزگۆت اۆچین همیشه یۆره‌کدن تاغاللا ادندیگینی آیتدی و فدراسیون مدلی نینگ بو مسئلأ چؤزگۆت بوُلماجاقدیغینی آیتدی.

تۆرکیأنینگ جمهورباشلیغی "حالقارا جمغیتچیلیگی بو حاقیقاتی قابول ادیپ دمیرقازیق قبرس تۆرک جمهوریتی نینگ قاراشسیزلیغینی تاناماغا و بو یورت بیلن دیپلماتیک، سیاسی و ایقدیصادی قاتناشیق باشلاماغا چاغیریارین" دیدی.

تۆرک یوُلباشچی یمن و فلسطین دأکی یاغدایلارا دا اۆنس چکدی و تۆرکیه بیلن اوروپا بیله له شیگی نینگ قاتناشیقلاری نینگ اؤسدۆریلمه گینه أتیأچ بار دیدی. أردوُغان اووپا بیله له شیگی نینگ ایکیرجینگلی توتومینی دا تانقیت اتدی.

آفریقا بیله له شیگی نینگ گ- 20 توُپارینا آلینماغینا دا حوُشاللیق بیلدیرن أردوُغان قفقازداقی یاغدایلار حاقیندا دا بیانات بردی.

تۆرکیأنینگ یوُلباشچیسی "گۆن اوُرتا قفقازینگ پاراحاتچیلیغی، دورنوقلیلیغی و حیذماتداشلیغی اۆچین تاریحی بیر پورصات دؤره یأر. بو پورصاتدان پیدالانماق اۆچین ارمنیستان بیلن یاغشی قوُنگشوچیلیق قاتناشیقلارینی ماقصات ادیأن بیر پروسه باشلاتدیق. آذربایجان بیلن ارمنیستان ینگ گچیریأن دوشوشیقلارینا دا قوُلداو بردیک. اِمما ارمنیستان بو تاریحی پورصاتدان ایسله ندیک یاغدایدا پیدالانمایار. ارمنیستان ینگ باشدا زنگه زور کریدوری نینگ آچیلماغی بوُلماق بیلن برن سؤزلرینی یرینه یتیرمه گینه قاراشیاریس. ایندی هممه تاراپلارینگ قابول ادیشی یالی قاراباغ آذربایجان ینگ توُپراغیدیر. موندان داشغاری یاغدای اۆچین باسیش اتمه‌ک آصلا قابول ادیلمِز" دیدی.

أردوُغان "ارمنیلر و هممه لرینگ آذربایجان توُپراغیندا پاراحاتچیلیق ایچرسینده بیله لیکده یاشاماغی بیزینگ أهمیتلی ماقصادیمیز بوُلمالیدی. بیر میللت ایکی دؤولت شیغاری بیلن حرکت ادنیمیز آذربایجان یوردونینگ توُپراق بیتولیگینی قوُراماق باراسینداقی ادن ایشلرینی قوُلدایاریس" دیدی.

تۆرکیأنینگ جمهورباشلیغی "تۆرک دؤولتلری قوراماسی نینگ بؤلگه آرا و گلوبال درجه ده تأثیرلی بوُلماغینی قوُلدایاریس" دیدی.