أردوُغان: گلاسکودا بایدن بیلن دوشوشیق گچیررین

تۆرکیأنینگ جمهورباشلیغی رجب طیب أردوُغان آمریکانینگ جمهورباشلیغی جو بایدن بیلن اسکاتلندینگ گلاسکو شهرینده دوشوشیق گچیرجکدیگینی آیتدی و "بو دوشوشیقدا البتده اینگ مؤهۆم اوغرومیز اف- 35 ساواش اوچارلاری بوُلار" دیدی.

أردوُغان آذربایجانا قوران ساپاریندان قایدیشین اوچاردا مطبوغات ایشگأرلرینه بیانات بردی.

أردوُغان ساپاریندا آذربایجان ینگ ارمنی باسیپ آلیشلیغیندان آزا ادیلن توُپراقلاریندا دورموشا گچیریأن یانگاداندان دیکه دیلیش و قالقینیش ایشلرینه یاقیندان گؤزه گچیلیک ادندیگینی، بؤلگه دأکی ایقدیصادی مۆمکینچیلیگینگ جانلاندیریلماغی، قاتناو حاطلاری نینگ دیکه دیلمه گی و تأزه یوُللارینگ قورولماغی بیلن باغلی ایشلره گؤزه گچیلیک ادندیگینی حابار بردی.

آذربایجان ینگ ایسرائیل بیلن ادیأن سؤودا قاتناشیقلارینا ایران تاراپیندان بیلدیریلن قارشیلیقلار بارادا دا سؤز آیدان أردوُغان، یورتلارینگ بیری بیری لری نینگ قارار برمه ک مکانیزملارینا تأثیر یتیرمه لی دألدیکلرینی نیغتادی و ایران ینگ بو یرده ساغدین پیکیرلیلیک بیلن حرکت اتمه گینی اومیت ادیأندیگینی بیان اتدی.

پرزیدنت أردوُغان توسساغلیقدا بوُلان عثمان کاوالانینگ آزات ادیلمه گی اۆچین 10 یوردونگ ایلچیلری نینگ برن چاغیریشلارینی و اوُندان سوُنگ تۆرکیأنینگ اوُلارا برن قارشیلیغی نینگ هم اۆستۆنده دوروپ گچدی و "بیزینگ ادیأن أدیمیمیز کأبیر تؤوه رکلره گۆیجۆمیزی گؤرکِزمه ک دأل، ایسه م تۆرکیه ده ایش آلیپ باریان ایلچیلرینگ تۆرکیأنینگ ایچرکی ایشلرینه قوُشولمازلیغی گؤرنۆشینده دیر. ایسله ندیک بیر ایلچی، ایش آلیپ باریان یوردونینگ ایچرکی ایشلرینه قوُشولماق ایغتیارینا ایه دألدیر" دیدی.

أردوُغان آمریکاداقی قازتلرینگ بو باباتدا یازان ماقالالاری نینگ سؤزباشیلاری بارادا بوُلسا "منینگ کیتابیمدا ایزا أدیم أتمه ک یوُق" دیدی.

آمریکانینگ جمهورباشلیغی جو بایدن بیلن اسکاتلندینگ گلاسکو شهرینده گچیرجک دوشوشیغی بیلن باغلی أردوُغان "بو دوشوشیقدا البتده اینگ اولی اوغرومیز اف-35 ساواش اوچارلاری بوُلار. اف- 35 لره بیزینگ 1 میلیارد 400 میلیون دلارلیق تؤله‌گیمیز بار. شوُل تؤله گ بیلن باغلانشیقلی هم البتده اوُنونگ بیزه نأحیللی یاغدایدا ایزینا بریلجکدیگی بیلن باغلی گپله شیکلریمیز بوُلار" دییپ مألیم اتدی.

آمریکانینگ تۆرکیأ اف- 16 حاربی اوچارلاری برمه ک ایسله یأندیگی بارادا ماغلومات آلاندیقلارینی آیدان أردوُغان،

"بیزه گلیپ قوُوشان ماغلوماتلارا لاییقلیقدا، اوُلارینگ اف- 35 اوچارلاری اۆچین تؤله گی ایزینا برمه ک میلناماسی بار. بو دوُغی می یا دا دأل می بولارینگ أهلیسینی اؤزلری بیلن ماصلاحاتلاشاریس. اینگ یوُقاری درجه ده مونی البتده منینگ بایدن بیلن ماصلاحاتلاشماغیم دوُغری بوُلار. اگر شولار یالی بوُلسا اوُندا شوُنگا گؤرأ ایلالاشیق باغلاشاریس" دیدی.

أردوُغان ترورچیلیغا قارشی گؤره شلره هم یوردونگ اؤز ایچینده هم ده داشاری یورتدا توتان یرلیلیک بیلن دوُوام اتدیرجکدیکلرینی بیان اتدی.