تۆرکیه ده، تۆرکمنلرینگ و تۆرکلرینگ قاهرامانی آلپ آرسلان یاتلانیار

تۆرکیأنینگ بیتلیس ولایاتی نینگ آحلات شهری بیلن موش ولایاتی نینگ ملازگرد شهرینده ملازگرددأکی ینگیشینگ 949-نجی ییللیغینا باغیشلانان دابارالار باشلادی.

949 ییل موندان اوُزال میلادی 1071-نجی ییلینگ 26-نجی آگوست یندا (هجری شمسی 450-نجی ییلینگ 30-نجی مردادیندا) تۆرکمنلرینگ اولی یوُلباشچیسی بوُلان سلچوقلی آلپ آرسلان ملازگرددأکی ینگیشی بیلن آناتولی نینگ و اوروپانینگ قاپیسینی تۆرکمن- تۆرکلره آچدی.

ملازگرد شوُل ساواشداقی ینگیش سبأپلی "تۆرکلرینگ آناتولا گیرن قاپیسی" دییپ بیلینیأر.

ملازگرد بیلن آحلات دا تۆرکیأنینگ هوُوا گۆیچلری نینگ آکروباسی توُپاری بولان تۆرک ییلدیزلاری، تاریحدا اؤزۆندن سؤز اتدیرن ینگیشینگ 949-نجی ییللیغینا باغیشلانان دابارانی گچیردی.

نوشهیرینگ ژاندارما آت و ایت ساپاق مرکزیندن (JAKRM) 8 آت و 8 آت چاپارینگ داباراسینا دا اولی قیزیقلانما باردی.

یاتلاما و قوتلاما دابارالاری نینگ بیرینجی گۆنۆنده دۆین چاغالار اۆچین ده آت چاپیلشیق، پینگ پنگ، گلف و بدمینتون یاریشی گچیریلدی.

میلادی 1071-نجی ییلدا تۆرکیأنینگ ملازگرد آدینداقی یرده سلچوقلی تۆرکمنلر و مسلمانلار بیلن بیزانس امپراتورلیغینداقی بیزانس، فرانک، روس، نورمن، گۆرجی، ارمنی، بلغار میللتلردن بوُلان قشونینگ آراسیندا ساواش بوُلدی.

شوُل ساواشدا سلجوقلی آلپ آرسلان ینگ 15-20 مۆنگ ساواشچیسی 200 مۆنگ ساواشچیسی بولان بیزانس امپراتورلیغینی ینگدی و تاریحدا آدینی آلتین حارپلار بیلن یازدیردی.

آسیا بیلن اوروپانینگ آراسیندا بیر کؤپری بوُلان آناتولی شیله لیک بیلن تۆرکمن تۆرکلر و مسلمانلارینگ الینه دۆشدی و سوُنگراقی سلچوقلی و عثمانلی یوُلباشچیلار تۆرکمنلرینگ و تۆرکلرینگ آدینی و شؤهراتینی اوروپانینگ اوُرتاسینا چنلی یانگلاندیردی.