Prezident Erdogan 12-nji Galkynyş maksatnamasyny beýan etdi

Prezident Erdogan X sosial media hasabyndan beren beýanatynda, 2053 meýilnamasy bilen işlerini alyp barýandyklaryny, Türkiyäniň geljek 5 ýyly bilen bagly ýol kartasyny orta goýan 12-nji Galkynyş maksatnamasyny tamamlandyklaryny mälim etdi. 

Prezident Rejep Taýýip Erdogan raýat jemgyýetçilik guramalary, hünär guramalary we işewür dünýäsiniň goşantlary bilen, bilelikde taýarlanan 12-nji Galkynyş maksatnamasyny şu gün mejlisiň garamagyna hödürlejekdiklerini habar berdi.

Prezident Erdogan 5 ýyllyk Galkynyş maksatnamasynyň 5 esasy ugurdan ybaratdygyny belläp: "Hünärli adamlar, berk maşgala, sagdyn jemgyýet. Durnukly ösüş, güýçli ykdysadyýet. Ýaşyl we sanly üýtgeşmeler bilen bäsdeşlik önümçiligi. Tebigy betbagtçylyga çydamly ýaşaýyş ýerleri, durnukly daşky gurşaw. Adalata esaslanýan demokratik dolandyryş" diýip habar berdi. 

12-nji Galkynyş maksatnamasy zamanynda ortaça 5 göterim derejesinde durnukly we deňagramly ösüşi maksat edinýändiklerini aýdan Prezident Erdogan, tapgyryň ahyrynda işsizlik derejesini 7,5 göterime çenli aşaklatmagy göz öňünde tutýandyklaryny mälim etdi. 

Inflýasiýany hemişelik ýagdaýda bir belgili görkezijä çenli aşaklatmagy, 2028-nji ýylyň ahyrynda 4,7 göterime çenli aşaklatmagy meýilleşdirýändiklerini aýdan Prezident Erdogan, Türkiye Asyryna barýan ýolda döwlete we millete ýolbelet boljak 12-nji Galkynyş maksatnamasynyň düşümli bolmagyny diledi. 

Prezident Hökümet ulgamynyň 2-nji Galkynyş maksatnamasy bolan we 2024-2028-nji ýyllary öz içine alýan 12-nji Galkynyş maksatnamasy, Prezident tarapyndan tassyklananyndan soň TBMM-niň garamagyna berildi.