Tunjeli welaýatynda "Eren Gyş-6" atly operasiýa başladyldy

Türkiýäniň Içeri işler ministrliginden berilen beýanatda, terror guramasy PKK-ny ýurdyň güntertibinden çykarmak we sebitde bardygy anyklanan terrorçylary täsirsiz ýagdaýa getirmek maksady bilen Tunjeli welaýatynda "Eren Gyş-6" atly operasiýa başladyldy.

Beýanatda ýurdyň içindäki terrorçylaryň dolulygyna ortadan aýrylmagy üçin alynyp barylýan Eren Gyş operasiýalarynyň, raýatlaryň goldawy bilen erjellik we tutanýerlilik bilen dowam etdirilýändigi mälim edildi. 

Içeri işler ministri Süleýman Soýlu beren beýanatynda: "Ýaşaýan ýerlerimizde asudalyk içinde, milletimiziň howpsuz ýagdaýda ýaşamagyny dowam etdirmegini üpjün etmek üçin gije-gündiz diýmän göreş alyp barýan, daglarda, meýdanlarda terrorçylary yzarlaýan howpsuzlyk güýçlermiz, žandarma güýçlerimiz şu gün irden Eren Gyş-6 operasiýasyny 1060 howpsuzlyk güýjüniň gatnaşmagynda başlatdy. Operasiýa Tunjeli welaýatynda Merjan daglary sebitde geçiriler" diýip habar berdi. 

Beýleki tarapdan Tunjeli welaýatynyň gubernatorlygyndan berilen beýanata görä, howpsuzlyk güýçleri Eren-7 Merjan Munzur operasiýasynyň çäginde Mazgirt we Hozat etraplarynyň obalyk ýerlerinde terrorçylara garşy operasiýa geçirdi. 

Meýdanlarda gözleg we saplaýyş işlerini geçirýän howpsuzlyk güýçleri, terror guramalary tarapyndan ulanylandygy anyklanan 7 gaçybatalga tapdy. Ýok edilen gaçybatalgalarda köp mukdarda ok-däri, ýarag, partlaýjy madda we gündelik ýaşaýyş üçin gerek bolan zatlar ele salyndy.