Türk metbugatynyň gysgaça mazmuny

“Haber Türk” gazeti “Erdoganyň Palestina hakyndaky ýüzlenmesi” söz başyly habarynda, Prezident R.T.Erdoganyň Gruziýanyň Premýer-ministri Irakli Kobahidze bilen geçiren metbugat ýygnagynda “Palestin halkynyň azatlyk göreşini bütin adamzat hukuk esasynda goldamaly. Dünýäniň çar tarpynda dowam edýän Palestina goldaw aksiýalary iňňän manyly we ähmiýetli” diýen sözlerini çap edýär.

“Sabah” gazeti “Gruziýanyň Premýer-ministri: Erdogan hakyky lider” söz başyly habarynda, Gruziýanyň Premýer-ministri Kobahidzäniň Erdoganyň diňe bir Prezident däl, eýsem bütin Türkiýäniň bähbitlerini goraýan hakyky liderdigini beýan edip; “Siziň liderligiňiz ählimize görelde bolýar” diýen sözlerini okyjy köpçüliginiň dykgatyna ýetirýär.

“Hürriýet” gazeti “Türkiýäniň taryhynda ilkinji” söz başyly habarynda, “Baýkar Tehnologiýa” firmasynyn ýokary derejeli ýolbaşçysy Haluk Baýraktaryň “Baýraktar TB2” ýaragly uçarmansyz howa ulaglarynyň soňky ulgamynyň düýn Polşa gowşurylandygyny beýan edip; “Şeýlelikde Türkiýäniň taryhynda ilkinji gezek NATO we ÝB-ne agza ýurtlardan birine ýokary tehnologiýaly dron eksportuny üstünlik bilen tamamladyk” diýen sözlerine ünsleri çekýär.

“Ýeni Şafak” gazeti “Sirkeji-Kazlyçeşme liniýasy Ýewropanyň sanawynda” söz başyly habarynda, Ulaglar we infrastruktura ministrligi tarapyndan abatlanyp, ulanylmaga berilen Sirkeji-Kazlyçeşme demir ýol ulgamynyň dünýäniň belli syýahatçylyk saýtlaryndan “biri bolan “loneyplanet.com” tarapyndan Ýewropada gezilip görülmeli 6 demir ýol ugrundan biri hökmünde görkezilendigini okyjy köpçüliginiň dykgatyna ýetirýar.

“Star” gazeti “Türkiýe 58 uniwersiteti bilen şu ýyl ýene-de iň ýokary wekilçilik edilen ýurt boldy” söz başyly habarynda, merkezi Britaniýada ýerleşýan ýokary bilimi derejelendiriş guramasy “Taýms haýger Edukeýşen” firmasynyň dünýäniň iň ýaş uniwersitetlerine orun berilýän 2024-nji ýylyň “Ýaş uniwersitetleriniň sanawynda” Türkiýäniň 58 uniwersitet bilen ýene-de esasy wekilçilik edilen ýurt bolandygyny ýazýar.