Türk metbugatynyň gysgaça mazmuny
Gün tertibiniň ileri tutulýan ugurlary hakyndaky habarlar gündelik gazetlerde giň seslenme döredýär
Hürriýet gazedi: "Türk astronawt älem giňişliginde 13 ylmy derňew geçirer" söz başyly habarynda, Türk astronawt Alper Gezerawjynyň 14 günüň dowamynda galjak Halkara Emeli hemra bekedinde 13 tapawutly ylmy derňew geçirjekdigini habar berýär. Şol synaglar mikrogravitasiýa, älem giňişliginde adamyň saglygy, Duz kölüniň ösümliginiň älem giňişligi gurşawynda derňelmegi, gaty-suwuk garyndylaryň agyrlyk güýjüniň bolmaýan gurşawda derňelmeginden ybarat bolar.
Ýeni Şafak gazedi: "Gezerawjy astronawtlaryň saglyk ýagdaýyny derňär" söz başyly habarynda, Türk astronawt Alper Gezerawjynyň älem giňişliginde geçirjek ylmy-derňewleriniň biriniň hem, dem alyş ulgamynyň fiziologiýasyndan ybarat boljakdygyny mälim edýär. Gezerawjy, emeli intellekt goldawly usul bilen astronawtlaryň duçar boljak pes agyrlyk güýji sebäpli ýüze çykýan saglyk meselelerini kesgitlemäge synanyşar. Şol synag dünýä derejesinde älem giňişligindäki saglyk bilen bagly ylmy-derňewlere uly goşant goşar.
Sabah gazedi: "Älem giňişligi ýolagçylygy çagalara ylham çeşmesi boldy" söz başyly habarynda, Türkiyäniň älem giňişligi ýolagçylygynyň çagalara ylham çeşmesi bolandygyny habar berýär. Şol gyzyklanma elektron söwda ulgamynada täsir ýetirdi. Soňky 1 hepdede esasan hem astronawtlaryň ýörite egin-eşiklerine, futbolkalara, gelmişekleriň egin-eşiklerine we maskalara bildirilýän gyzyklanma artdy. Türkiyäniň TEKNOFEST festiwalyna gatnaşjak ýaşlar älem giňişligi bilen bagly işlerini tizleşdirerler.
Star gazedi: "Türkiye Aýa älem gämisini ugradar" söz başyly habarynda, Älem giňişligine ilkinji astronawtyny ugradan Türkiyäniň nobatdaky ädiminiň Ay taslamasy boljakdygyny aýan edýär. Şol ugurda işlerini dowam etdirýän Türkiye 2026-njy ýylda Aýa ilkinji älem gämisini ugratmagy meýilleşdirýär. Türkiye Aýa özi tarapyndan özgerdilen we öndürilen älem gämisini ugradar.
Haber Türk gazedi: "Türk professorynyň Rak öýjükleriniň ýaýramagynyň öňüni aljak iş" söz başyly habarynda, Siwas Respublika uniwersitetiniň mugallymy Prof.Dr. Birnur Akkaýanyň Rak öýjükleriniň ýaýramagynyň öňüni aljak işlerini netijelendirip barýandygyny beýan edýär. Prof.Dr. Birnur Akkaýa rak öýjükleriniň ýaýramagynyň öňüni aljak işiň patentini aldy.
