Türk metbugatynyň gysgaça mazmuny
Gündelik gazetler ýurduň we dünýäniň gün tertibiniň ileri tutulýan ugurlary bilen bagly habarlara giň orun berýär.
“Haber Türk” gazeti “Erdogan: Netanýahu bütin sebitiň howpsuzlygyna wehim salýar” söz başyly habarynda, Prezident R.T.Erdoganyň Kataryň paýtagty Doha şäherinde guralan Aýlag hyzmatdaşlygy geňeşiniň sammitinde eden çykyşynda Ysraýylyň Premýer-ministri Binýamin Netanýahunyň we hökümetiniň syýasy ömrüni uzaltmak üçin bütin sebitiň howpsuzlygyna, geljegine wehim salýandygyny aýdandygyny ýazýar.
“Hürriýet” gazeti “Erdogan: Ysraýylyň eden jenaýatlary ýanyna galmaly däl” söz başyly habarynda, Prezident Erdoganyň Katarda eden çykyşynda: “Gazada başdan geçirilýän adamzat jenaýatydyr. Ysraýylyň edýän jenaýatlary jezasyz galmaly däl. Palestina döwletiniň döredilmeginiň ähmiýeti ýene-de bir gezek görüldi. Bu maksada laýyklykda kepillik bilen bilelikde sebit ýurtlary bilen bilelikde biz öz üstümize düşýän borçlary ýerine ýetirmäge taýýardygymyzy beýan etdik” diýendigini okyjy köpçüliginiň dykgatyna ýetirýär.
“Watan” gazeti “Türkiýäniň milli zeýtunçylygy ÝUNESKO-nuň sanawyna girizildi” söz başyly habarynda, Medeniýet we syýahatçylyk ministri Mehmet Nuri Ersoýuň Türkiýäniň milli zeýtunçylygynyň “ÝUNESKO-nuň Gyssagly gorag talap edýän konkret däl medeni miras sanawyna” goşulandygyny aýdandygyny ýazýar.
“Ýeni Şafak” gazeti “Türkiýäniň nebit başlangyjy” söz başyly habarynda, Türkiýäniň 66-a ýeten işjeň nebit diňi bilen Ýewropada gözleg işleriniň in ýokary bolan ýurduna öwrülendigini mälim edýär. Nebit pudagynda şu ýyl 33 sanysy ýerli, 10 sanysy daşary ýurt maýaly jemi 43 firma gözleg we önümçilik işlerini dowam etdirýär. Şu ýyl 195 sany guýy burawlanyp, jemi 418, 000 inedördül metr burawlaýyş işi amala aşyryldy.
“Star” gazeti “Togg, ABŞ-ly Teslany tagtyndan düşürdi” söz başyly habarynda, awtoulag satuwlarynda 1 million çäginden geçilip, ähli döwürleriň rekordy goýulan bolsa, “Toggyň” noýabr aýyndaky satuwynda “Tesladan” öňe geçendigine ünsleri çekýär. Türkiýäniň ýerli we milli awtoulagy “Togg” noýabr aýynda 4,401 ulagy eýelerine gowşuran bolsa, Amerikan “Tesla” 900 ulag gowşurdy.
