Türki Döwletleriň Kärdeşler arkalaşyklary guramasy döredildi

Garabagyň simwol şäheri bolan Şuşa şäherinde Türki Döwletleriň Guramasyna agza döwletleriň Kärdeşler arkalaşygy federasiýasynyň maslahaty geçirildi. 

Azerbaýjanyň Zähmetkeşler kärdeşler arkalaşygy konfederasiýasynyň başlygy Settar Mehbalyýewiň ýer eýeçilik etmeginde geçirilen maslahata, Türkiyäniň Zähmetkeşler kärdeşler arkalaşygy konfederasiýasynyň (TÜRK-İŞ) başlygy Ergün Atalaý, Gazagystanyň Zähmetkeşler kärdeşler arkalaşygy federasiýasynyň başlygy Satybaldy Dauletalin, Gyrgyzystanyň Zähmetkeşler kärdeşler arkalaşygy federasiýasynyň başlygynyň orunbasary Omor Asrtanbekow we Özbegistanyň Zähmetkeşler kärdeşler arkalaşygy federasiýasynyň başlygynyň orunbasary Bahtiýar Mehmetaliýew dagylar gatnaşdylar. 

Settar Mehbalyýew ol ýerde sözlän sözünde Türki Döwletleriň Guramasyna agza döwletleriň Kärdeşler arkalaşygy federasiýalarynyň Şuşa şäherinde bir ýerde jemlenmeginiň simwoliki häsiýete eýedigini belledi we Şuşa şäheriniň şol bir wagtda 2023-nji ýylyň Türk Dünýäsiniň Medeni paýtagtydygyny ýatlatdy. 

Doganlyk ýurtlaryň ähli guramadyr-edaralarynyň bilelikde hereket etmelidigini aýdan Settar Mehbalyýew Türki Döwletleriň Guramasyna agza döwletleriň Kärdeşler arkalaşygy federasiýalarynyň hem güýçlerini birleşdirmeginiň gerekdigini belledi. 

Maslahatyň ahyrynda Türki Döwletleriň Guramasyna agza döwletleriň Kärdeşler arkalaşygy federasiýalary tarapyndan Türki Döwletleriň Kärdeşler arkalaşyklary guramasynyň döredilmegi bilen baglanşykly ylalaşyk resminasyna gol çekildi.