Owganystanda gyz talyplaryň uniwersitetlerde bilim almaklaryna arakesme berildi

Talibanyň wagtlaýyn hökümediniň Ýokary okuw ministrliginiň metbugat sekretary Hafyz Ziýa Haşimi tarapyndan berilen beýanata görä, ýurtdaky ähli döwlet we hususy uniwersitetlere ýaş gyzlaryň bilim almaklary bilen bagly görkezme ugradyldy. 

Görkezmede Ministrler kabinetiniň mejlisiniň karary bilen gyz talyplaryň uniwersitetlerde bilim almaklary 2-nji görkezmä çenli arakesme berilendigi aýan edildi. 

ABŞ-nyň Döwlet sekretarlygynyň metbugat geňeşçisi Ned Praýs, Talibanyň uniwersitetlerde gyz talyplaryň bilim almaklarynyň böwet bolunmagynyň kabul edilmesizdigini we ABŞ-nyň oňa sanksiýalar bilen garşylyk görkezjekdiklerini beýan etdi. 

Ned Praýs Talibanyň kararynyň Owganystanyň ilatynyň ýarsyny ýokary okuwdan mahrum etjekdigini belledi. 

Owgan zenanlaryň ýylda ýurduň ykdysadyýetine 1 milliard dollardan gowrak goşant goşýandygyny aýdan Ned Praýs, Talibanyň şol goşandyň öňüni almaga synanyşýandygyny aýan etdi. 

Geçen ýyl 15-nji awgustda Owganystanyň häkimiýetiniň başyna geçen Taliban, başlangyç synp mekdeplerde we uniwersitetlerde gyz okuwçylaryň bilim almagyna rugsat beripdi. 

Taliban uniwersitetlerde gyzlaryň we oglanlaryň ders günlerini ikä bölüpdi. Gyz talyplar kesgitlenilen günlerinde bilim almaklaryny dowam etdirip bilýärdi. 

Gyz çagalaryň orta we liseý derejesindäki bilimlerini dowam etdirmeklerine bolsa rugsat berilmändi. 

Talibanyň resmileri gyz çagalaryň "Yslam çarçuwasynda" ýaňadandan gözden geçirilip, ýakyn wagtda açyljakdygyny aýtmagyna garamazdan, orta we liseý derejesindäki mekdepler açylmady.