ABŞ-nyň Maýami şäherinde çöken binanyň netijesinde ýogalan adamlaryň sany artmaga dowam edýär

ABŞ-nyň Florida ştatynyň Maýami şäheriniň Surfside etrapçasynda 24-nji iýunda gije çöken 13 gatly binanyň harabalyklarynyň arasynda dowam edýän gözleg işleriniň netijesinde çykarylan jesetleriň sany 94-e ýetdi. 

Maýami-Dade etrabynyň häkimi Daniella Lewin Kawa geçiren metbugat ýygnagynda, ýumrulan binanyň aşagyndan 94 adamyň jesediniň çykarylandygyny, harabalyklaryň aşagyndadygy çak edilýän ýene-de 22 adamyň bolsa entek tapylmandygyny beýan etdi. 

Daniella Lewin Kawa, ýogalan 94 adamyň 83-siniň şahsyýetiniň anyklanandygyny aýan etdi. 

Resmiler gözleg we halas ediş işleriniň 14-nji gününde ýumrulan binanyň aşagyndan diri adam tapmak ähtimallygynyň ýokdugyny, mundan beýläk jesetleriň tapylmagy we arassaçylyk bilen bagly işleriň geçirilýändigini habar berdi. 

Maýami Biçiň demirgazygynda takmynan 5 müň 600 ilatly Surfside diýilen ýerde 24-nji iýunda 13 gatly 270 otaglyk binanyň ýarsy duýdansyz ýagdaýda ýumrulypdy. 

Surfside etrapçasynyň resmileri, binanyň dolanşygy bilen 2018-nji ýylda geçiren ýazuw işlerinde 1981-nji ýylda gurulan bina zyýan ýetendigine ünsleri çekipdirler, jaýrylan sütünler bilen owranmaga başlanan betonda takmynan 9 million dollarlyk abatlaýyş işleriniň geçirilmeginiň gerekdigini beýan edipdirler.

Ady agzalan binanyň howpsuz bolmanlygy sebäpli binanyň galan bölegi hem 4-nji iýulda gözegçilik astynda ýumrulypdy.