آذربایجان تاخیملارینین اومودو ایکینجی اویون‌لاردا

آذربایجان فوتبال تاخیم‌لاری‌نین آوروپا لیگینده تور اومودو، ایکینجی اویون‌لارا قالدی.
یوفا آوروپا لیگی پلی اوف توروندا موباریزه ائدن قاراباغ اؤز ائوینده توئنته ایله ۰-۰ برابره قالارکن، صربیستانا قوناق اولان نئفتچی پارتیزانا ۳-۲ مغلوب اولدو.
قاراباغ فوتبال تاخیمی دونن یوفا آوروپا لیگی اؤن اله‌مه اویونوندا هلندین توئنته تاخیمی ایله قارشیلاشدی. قاراباغ، توئنته ایله ۰-۰ برابره قالا‌راق تور شانسینی ایکینجی اویونا بوراخدی. ایکینجی اویون‌، ۲۸ آگوستدا هلندده اویناناجاق.
بو توردا موباریزه ائدن بیر باشقا آذربایجان تاخیمی نئفتچی ایسه رقیب ائوینده صربیستانین پارتیزان تاخیمی ایله قارشیلاشدی. نئفتچی قارشیلاشمادا ۳-۲ اودوزارکن، تور شانسینی باکی‌داکی ایکینجی قارشیلاشماسینا بوراخدی. نئفتچی‌لرین ایکینجی اویونو دا اؤنوموزدکی هفته باکیدا اویناناجاق.