تورکیه‌نین کولتور خزانه‌سی(4)

بو گون سیزلره تورکیهنین اؤنده گلن توریزم مرکزلریندن نمرود داغینی تانیداجاییق. تورکیهنین گونئی دوغوسوندا آدییاماندا یئر آلان بو آنید مزار هلنیستیک دؤنم کراللاریندان آنتیوکوسا عایددیر. 1987.جی ایلده یونسکونون دونیا مدنیت میراثی لیستهسینه گیرن بو مزار دونیانین دؤرد بیر یانیندان قوناقلاری اؤزونه جلب ائدیر.

بؤیوک ایسکندرین میلاددان اؤنجه 3.جو یوز ایلده قوردوغو امپراتورلوق اؤلوموندن سونرا ژنراللاری آراسیندا دؤرده بؤلوندو. گونئی دوغو آنادولو بؤلگهسینه و سوریهنین بیر بؤلومونه صاحب اولان سلوکوس دؤولتی ضعیفلهیینجه کیچیک کراللیقلارا بؤلوندو. بونلاردان بیر بؤلومو سامسات مرکزلی کومماگن دؤولتی طرفیندن ایداره اولونوردو. کرال 1.جی آنتیوکوس میلاددان اؤنجه 69.جو ایلده تاختا چیخدی و دؤولتینین ان پارلاق دؤورونو یاشاتدی. اؤلکهسینده اینانیلان موختلیف دینلری بیرلشدیرمهیی و رهبرلیگینی داوام ائتدیرهبیلمهیی دوشونوردو. باتی و دوغو دینلرینه اینانان اؤلکه اینسانلارینی قاریشیق بیر اینانجا ایستیقامتلندیرمهیه چالیشدی. یونان تانریلارینی پرس تانریلارییلا قاریشدیرماق ایستهدی. بو اینانجین باشیندا دا آنتیوکوس یاری تانری-کرال اولاراق یئر آلیردی. بو یئنی دینی اینانجی یایماق اوچون اؤلکهسینین دؤرد بیر یانینا قوتسال مکانلار اینشا ائتمهیه باشلادی. بونلاردان بیری ده اطرافداکی ان یوکسک داغلاردان بیری اولان نمرود داغیندا اؤزو اوچون آنید مزار و تاپیناق اولاجاقدی. بورانین دنیزدن یوکسکلیگی 2200 متر ایدی. نمرود داغی دؤرد بیر یانا حاکیم مؤحتشم بیر منظرهیه صاحیب. اؤلکهنین دؤرد بیر یانیندان صنعتچیلری گتیرهرک مزار و معبد اینشاسینا باشلادی. اؤنجه اصل مزار اوتاغی و ایکی ساختا مزار اوتاغی اینشا ائدیلدی. بونلاردان دیشاری اوزاناجاق و گیریشی تامین ائدهجک تونللر ده آچیلدیقدان سونرا مزار اوتاغینین اوستونه تومولوس ینی کیچیک داشلاردان چوخ یوکسک ییغما مزار تپهسی یارادیلدی. آردیندان بو تومولوسون دوغو و لاتی تئراسلارینا آنا و آتا سمبولو اولاراق ایکی تاپینما ساحهسی اینشا ائدیلدی. بورادا اینشا ائدیلن بؤیوک هیکللر و قابارتمالاردا هم پرس تانریلاری هم یونان تانریلاری ایشتیراک ائتدی. بو تانری هیکل و قابارتمالارینین آراسیندا تانریلاشدیریلمیش آنتیوکوس دا یئرینی آلدی. بو قابارتمالاردان بیرینده آسلان سیرا اولدوزو وار. بو قابارتما ان اسکی هوروسکوپ - اولدوز خریطهسی اولاراق بیلینیر.

آنتیوکوسون اؤلوموندن سونرا بورایا باسدیریلدیغینا اینانیلیر. اولتراسون بنزری گؤرونتولهمه اوصوللارییلا یئرلری تاپیلان مزار اوتاقلارینا چاتماق اوچون ائدیلن بوتون قازی گیریشیملری اوغورسوزلوقلا نتیجهلندی. کیچیک داشلاردان عبارت اولان تپهیه هر مداخیله تراسلاردا یئر آلان هیکل قروپونا ضرر وئریر. گلهجکده تکنولوژینین اینکیشافییلا بیرلیکده مزار اوتاقلارینا چاتیلابیلر. بئله بیر موفقیت میصیر پیرامیدلرینده اولان توتانکامونون مزار اوتاغینین تاپیلماسیندان سونرا آرکئولوژی ساحهسینده ائدیلهجک ان بؤیوک کشف اولماغا آدایدیر. 2000 ایلدن چوخ باغلی قالان مزار اوتاغی و ساخلادیغی بیلگیلر اینسانلیق تاریخینه ایشیق توتاجاق.

گونوموزده دونیانین دؤرد بیر یانیندان اینسانلار نمرود داغینی گؤرمهیه گلیر. یوکسکلیکدن اؤترو عمومیتله یاز آیلاریندا بو داغا چیخیلابیلیر. داغا چاتان بیر چوخ انسان سحر گونشین دوغوشونو گؤرمک اوچون گئجهنی بورادا گئچیریر. اراضینین قورولوشوندان اؤترو گون دوغوشو سیراسیندا فرقلی بیر طبیعت یاشانیر. گونش بیر نؤقطهده ایکن بیردن بیر باشقا نؤقطهیه سیچرامیش کیمی آلقیلانیر. جولای آییندا بئله گئجهلری چوخ سویوق، پتو و قیشلیق پالتارلارا احتیاج دویولان بو داغدا بو سببله بیر گئجه گئچیرمهنین دادینا دویولماز.

دونیا توریزم یازارلاری و ژورنالیستلری فدراسیونو طرفیندن 2004.جو ایلده نمرود داغینا دونیاداکی ان بؤیوک اوستون موفقیت اؤدوللریندن بیری اولان و توریزم اوسکاری ساییلان قیزیل آلما اؤدولو وئریلدی. توریزمین کیفیتینین آرتیریلماسی و اینکیشاف ائتدیریلمهسی اوچون وئریلن بو "قیزیل آلما" اؤدولو آدییامان موزهسیندهدیر.