آمریکانین آنکارا ائلچیسیندن تورکیه یورومو

آمریکا بیرلشمیش دؤولتلرینین آنکارا ائلچیسی جف فلیک، "تورکیه کیمی بؤلگه‌سل گوجلر رول اوینامادان غزه‌ده حل یولونا چاتماق چتیندیر" دئدی.

ام‌اس‌ان‌بی‌سی‌ده بیر پروگراما قوناق اولان ائلچی جف فلیک، تورکیه‌نین، آمریکا ایله ایلیشکیلری، روسیا-اوکراینا ساواشیندا‌کی مؤوقعیتی و ایسرائیلین غزه‌یه قارشی سالدیریلاری قارشیسینداکی توتومونا باغلی دگرله‌ندیرمه‌لر وئردی.

فلیک "قوزئیده اوکراینادا ساواش وار، گونئیده غزه‌ده ساواش وار و تورکیه تام اورتادا یئر آلیر. یوزده ۹۷سی مسلمان اولان بیر اؤلکه اولاراق فیلیسطینلیلره قارشی درین بیر یاخینلیق دویدوقلاری آچیقدیر. بونا گؤره ایسرائیلین غزه‌یه گیرمه قونوسوندا ائتدیکلرینی چوخ تنقید ائدیرلر. ضامن اولاراق حرکت ائتمه‌یه و قالیجی بیر باریش اوچون دیگر بؤلگه‌سل اورتاقلارییلا بیرلیکده چالیشماغا ایستکلی اولدوقلارینی ایفاده ائتدیلر. اونلار دا بیزیم کیمی ایکی دؤولتلی حلی دستکله‌ییرلر. بونا گؤره بیرلیکده چالیشاجاغیمیزی دۆشونوره‌م. تورکیه کیمی بؤلگه‌سل گوجلر رول اوینامادان غزه‌ده حل یولونا چاتماق چتیندیر" دئدی.

تورکیه‌نین، اوکراینانین اگمنلیگینی دستکلدیگینی ده وورغولایان فلیک، اوکراینانین تورکیه‌دن تداروک ائتدیگی سیهالارین روسیا ایله ساواشدا چوخ اؤنملی بیر رول اوینادیغینی قید ائتدی.