اردوغان بؤیوک فیلیسطین میتینگینده دانیشدی
"هر کس بیلیر کی ایسرائیل بؤلگه‌ده یالنیز، گونو گلنده فدا ائدیله‌جک بیر عسگردیر"
جمهورباشقانی رجب طیب اردوغان، ایسرائیلین ۳ هفته‌دیر بومبالادیغی غزه یولاغیندا اولانلارا سسسیز قالان باتیلی اؤلکه‌لری،
"اوکراینادا اؤلنلر اوچون گؤزیاشی تؤکدونوز ده غزه‌ده‌کی بالالار اوچون نیه سسینیز چیخمیر" سؤزلریله تنقید ائتدی.
جمهورباشقانی اردوغان، ایستانبول‌دا تشکیل ائدیله‌ن بؤیوک فیلیسطین میتینگینده دانیشدی.
یارین تورکیه جمهوریتینین قورولوشونون ۱۰۰.جو ایلینین جوشغوسونو، بو گون ایسه غزه اوچون اورکلرین یانغینینی بوتون عالمه هایقیراجاقلارینی وورغولایان اردوغان،
"اوفوقوموزون اوزاندیغی هر یئرده اورکلرینی و گؤزلرینی بیزه چئویرمیش قارداشلاریمیزین دردلریله دردلندیگیمیز کیمی، غزه اوچون ده آیاقداییق" دئدی.
قیریمدان قاراباغا، بوسنیدن کرکوکه، فیلیسطیندن تورکیستانا، افغانیستاندان چئچئنیستانا بیر چوخ جغرافیا اوچون گؤزیاشی تؤکدوکلرینی ایفاده ائد‌ن اردوغان،
"بیز بورادا یالنیز غزه‌ده یاشانان قیرغینی تلعین ائتمکله قالمیریق، اونونلا بیرلیکده اؤز ایستیقلالیمیزین و گله‌جگیمیزین ده مدافعه‌سینی ائدیریک" شکلینده دانیشدی.
فیلیسطین مقاومت حرکتی حماسین ترور هؤرگوتو اولمادیغینی بیر دفعه داها ایفاده ائد‌ن جمهورباشقانی، بو سؤزوندن راحاتسیز اولدوغونو خاطیرلاتدیغی ایسرائیله تپکیسینی،
"۱۹۴۷ده غزه، فیلیسطین نه ایدی، بو گون نه؟ ایسرائیل سن بورالارا نئجه گلدین؟ نئجه گیردین؟ سن بیر ایشغالچیسان، سن بیر هؤرگوتسن" شکلینده دیله گتیردی.
دونن اوکراینا-روسیا ساواشیندا اؤلدورولن وطنداشلار اوچون یالاندان گؤز یاشلاری تؤکه‌نلرین، بو گون (غزه‌ده) مینلرجه سوچسوز اوشاغین اؤلومونو سسسیزجه ایزله‌دیگینه ایشاره ائد‌ن اردوغان،
"اوکراینادا اؤلنلر اوچون گؤزیاشی تؤکدونوز ده غزه‌ده‌کی بالالار اوچون نیه سسینیز چیخمیر" سؤزلریله تنقید ائد‌رک،
"هر کس بیلیر کی ایسرائیل بؤلگه‌ده یالنیز، گونو گلنده فدا ائدیله‌جک بیر عسگردیر" دگرلندیرمه‌سینی دیله گتیردی.
ایسرائیلین قیرغینلارینا دستک اولان باتی دونیاسینا دا سسلنه‌ن اردوغان،
"ای باتی سیزه سسلنیرم. یئنیدن بیر هیلال-خاچلی مجادله‌سی می اسدیرمک ایسته‌ییرسینیز؟ اگر بئله بیر چابانین ایچریسینده‌سنیزسه، بیلین کی بو میللت اؤلمه‌دی" شکلینده دانیشدی.
باتی دونیاسینین غزه‌ده‌کی اوشاق، قادین، سوچسوز قیرغینینی مشروعلاشدیرماق اوچون سیاستچیسیندن مئدیاسینا سفربر اولدوغونو وورغولایان جمهورباشقانی، ایسرائیلین آچیقجا ساواش سوچو ایشله‌دیگینی ایفاده ائتدی.
ایسرائیلی ساواش سوچلوسو اعلان ائد‌جکلرینی بیلدیره‌ن اردوغان،
"ایندی بونون حاضرلیغی ایچینده‌ییک، بونون چالیشماسینی یئریدیریک و ساواش سوچلوسو اولاراق ایسرائیلی دونیایا تانیداجاغیق" دئدی.
ایسرائیلین ۷ اکتبردان بو یانا غزه‌یه قارشی آرالیقسیز سوره‌ن سالدیرلاریندا، چوخو اوشاق و قادین ۷ میندن چوخ فیلیسطینلی حیاتینی ایتیردی.
