اردوغان، لیدئرلر ذیروهسی چرچیوهسینده گؤروشمهلر گئچیریر
آمریکا جمهورباشقانی جو بایدن ایستانبولون ایستیقلال جادهسینده تؤرهدیلهن ترور سالدیریسیندا حیاتینی ایتیرهنلر ایله باغلی تۆرکیه جمهورباشقانینا باشساغلیغی وئردی
تۆرکیه جمهورباشقانی رجب طیب اردوغان، اندونزینین بالی آداسیندا گئچیریلهن گ-۲۰ لیدئرلر ذیروهسی چرچیوهسینده گؤروشمهلر گئچیریر.
رجب طیب ردوغان بو چرچیوده آمریکا جمهورباشقانی جو بایدنله بیر آرایا گلدی.
گؤروشمه مطبوعاتا قاپالی گئچیریلدی.
تۆرکیه جمهورباشقانلیغی ایلهتیشیم باشقانلیغیندان وئریلهن آچیقلامایا گؤره، گؤروشمهده تیجارت و گوونلیک مسئلهلری باشدا اولماقلا ایکی اؤلکه آراسینداکی ایلیشکیلر موذاکیره ائدیلدی.
گؤروشمه زامانی آمریکا جمهورباشقانی جو بایدن ایستانبولون ایستیقلال جادهسینده تؤرهدیلهن ترور سالدیریسیندا حیاتینی ایتیرهنلر ایله باغلی تۆرکیه جمهورباشقانینا باشساغلیغی وئردی.
بؤلگهسل حادثهلرین ده دگرلندیریلدیگی گؤروشمهده بایدن روسیا ایله اوکراینا آراسینداکی تاخیل دهلیزی مسئلهسیندهکی پروبلئمین حلی و تاخیل داشینماسینین یئنیدن باشلاماسی اوچون گؤستردیگی چابالارا گؤره جمهورباشقانی رجب طیب اردوغانا تشکر ائتدی.
تۆرکیه ایله آمریکا آراسیندا اف-۱۶ پروسهسینی دستکلهمهیه داوام ائدجکلرینی بیلدیرهن آمریکا جمهورباشقانی بایدن تۆرکیهنین سوئدین ناتو عضولوگو پروسهسینده اؤنملی بیر آکتور اولدوغونو دا بیلدیردی.
آغ ائوین آچیقلاماسینا گؤره، گؤروشمهده ایستانبولدا تؤرهدیلهن ترور سالدیریسی باشدا اولماقلا بؤلگهسل و کۆرهسل حادثهلر موذاکیره ائدیلدی.
ناتو متفیقی تۆرکیهنین یانیندا اولدوقلارینی وورغولایان بایدن تورک خالقینا درین حوزنله باشساغلیغی وئردی.
تاخیل دهلیزینین روسیا-اوکراینا ساواشی زامانی کۆرهسل ارزاق گوونلیگینین یاخشیلاشدیریلماسی اوچون بؤیوک اؤنم داشیدیغینی و آنلاشمانین داوام ائتدیریلمهسینین اؤنمینی وورغولایان بایدن، اردوغانا آنلاشمانین یئنیلنمهسی اوچون گؤستردیگی چابالارا گؤره تشکر ائتدی.
تۆرکیه جمهورباشقانی آیریجا فرانسا جمهورباشقانی امانوئل مکرونلا دا گؤروشدو. گؤروشمه مطبوعاتا قاپالی گئچیریلدی.
تۆرکیه جمهورباشقانلیغی ایلهتیشیم باشقانلیغیندان وئریلهن آچیقلامایا گؤره، فرانسا جمهورباشقانی مکرون ایستانبولدا تؤرهدیلهن ترور سالدیریسیندا حیاتینی ایتیرهنلر ایله باغلی تۆرکیه جمهورباشقانینا باشساغلیغی وئردی.
تۆرکیه-فرانسا ایلیشکیلرینین و بؤلگهسل مسئلهلرین موذاکیره ائدیلدیگی گؤروشمهده اردوغان ایکی اؤلکه آراسیندا تیجارتله یاناشی، ساوونما و انرژیده امکداشلیغین گلیشدیریلمهسینین اورتاق چیخارلارا خیدمت ائتدیگینی بیلدیردی.
بؤیوک چابالاردان سونرا تاخیل دهلیزینین یئنیدن فعالیته باشلادیغینی بیلدیرهن اردوغان آنلاشمانین داوام ائتدیریلمهسی اوچون آوروپا بیرلیگینین دا اۆزرینه دوشهنی ائتمهسینین اؤنمینی قید ائتدی.
رجب طیب اردوغان آیرجا ایتالیا باشباخانی جورجا ملونی ایله ده گؤروشدو.
گؤروشمه مطبواعتا قاپالی گئچیریلدی.