اردوغان: بیزیم اسدی مغلوب ائدیب ائتمهمک کیمی بیر سورونوموز یوخ
جمهورباشقانی اردوغان دونن اوکراینایا ائتدیگی بیر گونلوک سفریندن سونرا تورکیهیه قاییداندا، اوچاقدا ژورنالیستلرین سواللارینی جاوابلاندیردی
جمهورباشقانی رجب طیب اردوغان، سوریه ایله داها ایرلی سویهده آددیملاری تامین ائتمهلری لازیم اولدوغونو وورغولایاراق،
"دیپلوماسینی هئچ واخت دؤورهدن چیخارابیلمزسینیز" دئدی.
جمهورباشقانی اردوغان دونن اوکراینایا ائتدیگی بیر گونلوک سفریندن سونرا تورکیهیه قاییداندا، اوچاقدا ژورنالیستلرین سواللارینی جاوابلاندیردی.
تورکیهنین سوریهنین قوزئیینده ترورلا موباریزهسینی روسیا ایله بیرلیکده داوام ائتدیردیگینی بیلدیرهن اردوغان:
"ترورلا موباریزهنین بللی بؤلومونو روسلارلا بیرلیکده ائدرکن، بللی بؤلومونو ده اؤز عسگرلریمیز، گوونلیک گوجلریمیزله حیاتا گئچیریریک" دئدی.
ترورو سوریهده بیرینجی درجهده بسلهینین آمریکا و کوالیسیون گوجلری اولدوغونو وورغولایان اردوغان:
"بونو آچیماسیزجا ائتمیشلردیلر و هله ده ائدیرلر" دئدی.
جمهورباشقانی اردوغان،
"بیزیم (بؤلگهیه عملیات اوچون) بیر گئجه آنیدن گلهبیلریک ایفادهمیز بوشونا دئییل. واختی گلنده ائدیلیر. اما بونو دا دئییم؛ بیر کره تورکیهدن هئچ کیم بئله بیر شئیه (عملیاتا) حاضیرسینیزمی سوروشماسین. بیز بوتون بونلارا حاضیریق. نه لازیمدیرسا ائتمه گوجوموز وار" ایفادهلرینی ایشلتدی.
آمریکانین تروریستلره عراقدا دا دستک وئردیگینی دئیهن اردوغان:
"اگر بو گون عراقدا راحاتسیزلیق وارسا، تأسف کی، بونون آرخاسیندا یئنه آمریکا وار و بو ترور هؤرگوتلری ایله آغ ائوده گؤروشهجک قدر ایرلی گئدیرلر. بیز بوتون بونلاری بیلیریک" دئدی.
تورکیهنین سوریه تورپاقلاریندا گؤزونون اولمادیغینی بیلدیرهن جمهورباشقانی:
"بیزیم اسدی مغلوب ائدیب ائتمهمک کیمی بیر پروبلئمیمیز یوخدور. بیزیم سوریه تورپاقلاریندا گؤزوموز یوخ، چونکو سوریه خالقی بیزیم قارداشیمیزدیر. اورادا بیزیم بئله پروبلئمیمیز یوخ. اونلارین تورپاقلارینین بوتؤولوگو بیزیم اوچون اؤنملیدیر. رژیم بونو درک ائتمهلیدیر" ایفادهسینی ایشلتدی.
دؤولتلر آراسیندا هئچ واخت سیاسی دیالوگون و یا دیپلوماسینین کسیب آتیلمایاجاغینی دئیهن جمهورباشقانی:
"هر زامان هر آن بو جور دیالوگلار اولور، اولمالیدیر" دئدی.