آکار: "تورکیه مونترو بوغازلار آنلاشماسینی تطبیق ائتمه‌یه داوام ائده‌جک"

میللی ساوونما ناظیری حولوصی آکار مونترو بوغازلار آنلاشماسینا (1936) ضرر وئرمه‌یه جهد ائتمه‌یین هئچ کیمه فایدا وئرمه‌یه‌جگینی ایفاده ائده‌رک، ایندییه قدر ائتدیک‌لری کیمی بوندان سونرا دا کنوانسیون ماده لرینی تطبیق ائتمه‌یه داوام ائده‌جک‌لرینی ایفاده ائدیب.

جمهور باشقانی رجب طیب اردوغانین صدرلیگی ایله دونن (28 فوریه) کئچیریلن ناظیرلر کابینه‌سی‌‌نین ایجلاسیندان سونرا آکار ژورنالیست‌لرین گوندمله باغلی سوال‌لارینی جاوابلاندیریب.

روسیانین اوکراینایا هوجومو ایله باغلی آکار هر ایکی اؤلکه‌نین تورکیه ایله دنیز یولو ایله قونشو اولماسینا دقت چکیب.

روسیانین اوکراینانین اگمنلیگینه و اراضی بوتؤو‌لوگونه قارشی بو عملیاتی قبول ائتمه‌سی‌نین مومکون اولمادیغینی وورغولایان آکار "روسیانین اوکراینانین اگمنلیگینه و اراضی بوتؤو‌لوگونه قارشی بو عملیاتی قبول ائتمه‌سی مومکون دئییل. بونون اولوسلار آراسی حقوقا ضد اولدوغونو گؤروروک. باشدا اینسانی یاردیم اولماقلا اینسانی فاجعه‌یه سون قویولماسی اوچون عهده میزه دوشنی ایندییه‌دک یئرینه یئتیردیک، بونو عینی شکیلده داوام ائتدیریریک" دئییب.

ناظیر آکار قارا دنیزین رقابت بؤلگه‌سینه چئوریلمه‌سی‌نین قارشی‌سینی آلماق اوچون سعی گؤستردیک‌لرینی بیلدیریب:

"قارا دنیزه ان اوزون ساحلی اولان اؤلکه اولا‌راق بو آنلاییشی بیر پرینسیپ اولا‌راق قورویوب ساخلادیق. تورکیه اولا‌راق بوتون گؤروش‌لریمیزده قارا دنیزده باریشین، امین-آمانلیغین و تهلوکه‌سیز موحیطین قورونماسینا چالیشدیق. تورکیه اولا‌راق، بوتون مسئله‌لره بو چرچیوه‌ده باخمیشیق. عینی شکیلده باخیریق. ایندییه قدر ائتدیگیمیز کیمی، مونترو بوغازلار آنلاشماسینین 19، 20 و 21-جی مادده‌لرینی حیاتا کئچیرمه‌یه داوام ائدجییک".

مولود چاووش اوغلو، خاریجی ایشلر ناظیری "اگر تورکیه محاربه‌نین طرفی دئییلسه، دؤیوشن اؤلکه‌لرین گمی‌لرینی بوغازدان کئچیرمه‌مک صلاحیتی وار. اگر حربی گمی قارا دنیزده‌کی بازاسینا قایی‌دیرسا، کئچید باغ‌لانمیر. بیز مونترو ماده لرینی تطبیق ائدیریک" دئیه بیانات وئریب.