سوباجی: توپلوملارین و فردلرین سسی اولماغا چالیشیریق

تورکیه رادیو و تلویزیون قورومو (ت‌رت) باش مودورو محمد زاهد سوباجی، دونیانین ایندی هر زامانکین‌دن داها آرتیق دیالوگا، مذاکیره‌یه، اورتاق دوشونجه‌یه، فیکیر موبادیله‌سینه و یئنی بیر آنلاییش گلیشدیرمه‌یه احتیاج اولدوغونو سؤیله‌دی.

سوباجی، "گوج و پارادوکس: ۲۱.جی عصرده بؤیوک استراتژینی آنلاماق" قونوسون‌دا بو ایل ۵.جی دفعه آنلاین اولاراق گئچیریله‌ن ت‌رت وورلد فورومو ۲۰۲۱ین آچیلیش دانیشماسینی ائتدی.

۳۰ دان چوخ اؤلکه‌دن ۱۰۰یه یاخین دانیشماچییا ائو صاحب‌لیگی ائتدیگی ت‌رت وورلد فورومون‌دا بوتون بشریتی راحاتسیز ائد‌ن قلوبال پروبلئملرین ایکی گون عرضین‌ده مذاکیره ائدیله‌جگینی ایفاده ائد‌ن باش مودرو، دونیانین ایندی هر زامانکین‌دن داها آرتیق دیالوگا، مذاکیره‌یه، اورتاق دوشونجه‌یه، فیکیر موبادیله‌سینه و یئنی بیر آنلاییش گلیشدیرمه‌یه احتیاج اولدوغونو وورغولادی.

۲۰.جی عصرین سونلارین‌دان بری دؤولتلرین اوللر هئچ قارشیلاشمادیقلاری و بوتون اینسان‌لیغی راحاتسیز ائد‌ن عمومی پروبلئملرله اوزلشدیکلرینه ایشاره ائد‌ن سوباجی، آشاغی‌داکی دگرلندیرمه‌نی ائتدی:

"قلوبال تروریزم، کووید-۱۹ کیمی سالقینلار، ائکولوژیک فلاکتلر، قلوبال ایستیلشمه، اینترنت‌ده تؤره‌دیله‌ن سوچلار و سابیری سالدیریلار، کوتلوی کؤچلر و گلیر بؤلگوسو عدالت‌سیزلیگی کیمی میللی سرحدلری آشان مرکب پروبلئملر، قلوبال سیاسی و اقتصادی سیستمی چوخ اؤلچولو بحرانلار و تهدیدلرله قارشی قارشییا بوراخدی. حاضیردا اولوسلارآراسی میقیاس‌دا پروبلئملرین حلی اوچون امکداش‌لیق و قارشی‌لیق‌لی باغیملی‌لیق اؤن پلانا چیخیر. قلوبال اقتصادی و سیاسی سیستمین ائتکینلیگی یوکسک سویه‌لی، هر طرف‌لی و کسینتیسیز قلوبال امکداشلیغا باغلی‌دیر".

سوباجی، ت‌رت وورلد فورومو ایله قلوبال و بؤلگه‌سل مؤوضوعلاری چوخ سسلی و چوخ اؤلچولو بیر پرسپئکتیوده اولوسلارآراسی توپلومون گونده‌مینه گتیردیکلرینی سؤیله‌یرک،

"اینسانلاری مرکزه قویان یایین آنلاییشیمیزلا ضعیف جغرافیالارین، جمعیتلرین و فردلرین سسی اولماغا چالیشیریق. یایین پرینسیپلریمیزه اویغون اولاراق دونیامیزی تهدید ائد‌ن بوتون بحرانلارا قارشی حساسیتمیزی، تلویزیون و رادیو کاناللاریمیز و دیجیتال پلتفورملاریمیز واسطه‌سیله دونیانین ۷ قاره‌سینه ۴۱ دیل‌ و لهجه‌ده چاتدیریریق" دئدی.

بو پروسه‌ده یایینچیلارین دا اوزرینه بؤیوک وظیفه‌لر دوشدویونو وورغولایان سوباجی،

"گونوموزون پروبلئملرینه ایشیق توتان و اجتماعی و قلوبال فرقینده‌لیگین آرتیریلماسینا قاتقی وئره‌ن یئنی بیر یایینچیلیق آنلاییشی دیجیتال یؤنتیشیم دؤورونون آیریلماز بیر حصه‌سینه چئوریل‌میش دورومدا. بو باغلامدا ت‌رت وورلد فورومو گله‌جگین شکیللنمه‌سینده فیکری بیر دارتیشما پلتفورمو اولاراق چوخ دگرلی گؤروروک" دئدی.