اردوغاندان کؤچ ایله مبارزه آچیقلاماسی
"اژه دنیزی، امکداشلیق و باریشین سمبولو اولمالی ایکن تأسف کی، سون ایللرده انسانی تراژدیلرله گوندمه گلمکدهدیر"
جمهورباشقانی رجب طیب اردوغان،
"تورکیه، سوریه قایناقلی دوزنسیز کؤچون انگللنمهسینه قارشی وئردیگی اولاغان اوستو مبارزهده تک باشینا بوراخیلمیشدیر" دئدی.
اردوغان، دوققوز سپتامبر اونیورسیتهسی و باشکند اونیورسیتهسی طرفیندن تشکیل ائدیلهن آدالار دنیزی و یونانیستان ایله قونشولوق ایلیشکیلری پروبلئملری سمپوزیومونا ویدئو مئساژ گؤندردی.
اردوغان، بونلاری دئدی:
"اژه دنیزی، امکداشلیق و باریشین سمبولو اولمالی ایکن تأسف کی، سون ایللرده انسانی تراژدیلرله گوندمه گلمکدهدیر. سوریهده تخمیناً ۱۱ ایلدیر سورهن ایچ ساواش و قیرغینلاردان قاچان مینلرجه کؤچمن، اژه دنیزینده حیاتینی ایتیرمیشدیر. کؤچمنلری اؤز تورپاقلاریندا گووهن و دینجلیک ایچینده یاشاداجاق آددیملارین هئچ بیری آتیلمامیشدیر. تورکیه، سوریه قایناقلی کؤچون انگللنمهسینه قارشی وئردیگی اولاغان اوستو مبارزهده تک باشینا بوراخیلمیشدیر. سوریهلی مظلوملارا باغلانان قاپیلارین، اؤلکهمیزده چئویلیشه گیریشمیش، ۲۵۱ وطنداشیمیزین قانینی تؤکموش فئتؤچو جانیلره سونونا قدر آچیلماسی انسانلیق آدینا اوتانج قایناغیدیر".
بو تابلو قارشیسیندا یونانیستانین، تورکیهنین یاخشی نیتلی چابالارینا آنلاملی قاتقی وئرمک یئرینه، ماکسیمالیست سیاستلرینه سرعت وئردیگینه دقت چکن اردوغان،
"سیغینماچی بحرانی، ایکی اؤلکه آراسینداکی امکداشلیغین گوجلندیریلمهسینه وسیله اولابیلهجک ایکن، بو تاریخی فرصت یونانیستانین اوزلاشماز توتومو سببی ایله هئچ ائدیلمیشدیر" دئدی.
تورکیهنین تاریخده اولدوغو کیمی بو گون ده اژه دنیزینین گرگینلیک و چکیشمهدن چوخ دوستلوقلا خاطیرلانماسینی آرزو ائتدیگینی وورغولایان اردوغان، بو آنلاییشلا ایندییه قدر گرگینلیگی آرتیران طرف اولماماغا دقت گؤستردیکلرینی ایفاده ائتدی.
اردوغان، دنیز صلاحیت ساحهلری، آدالارین غیر حربی ایستاتوسونون پوزونتوسو و ناوتکس (دنیزچیلره اعلان) اعلانلاری باشدا اولماق اوزره قونشو یونانیستانین گرگینلیگی یوکسلدن آددیملاری قارشیسیندا دائما سهولتله داوراندیقلارینی، مسئلهلری دیالوگ و مذاکره ایله حل ائتمهیه اؤنجهلیک وئردیکلرینی خاطیرلاتدی.
رجب طیب اردوغان، سؤزلرینی بئله داوام ائتدیردی:
"قونشوموز یونانیستاندان حاق و منفعتلریمیزه سایغی گؤسترمهسینی، تک طرفلی حرکتلردن قاچینماسینی گؤزلهییریک. یونانیستان ایله حق، عدالت و امکداشلیغا دایالی، قونشولوق حقوقونو گوز اؤنونه آلان چؤزوم یوللاری تاپاجاغیمیزا اینانیرام".