تورکیه‌دن ارمنیستانداکی بحرانلا باغلی آچیقلاما
"تورکیه‌نین بو توتومو ایلکه‌لی بیر توتوم‌دور، چئوریلیشه قارشیییق"
تورکیه، دونیانین هر یئرین‌ده چئوریلیش و چئوریلیش گیریشیملرینه قارشی اولدوغونو، ارمنیستانداکی گلیشمه‌لری ده شدتله قینادیغینی آچیقلادی.
خاریجی ایشلر باخانی مؤولود چاووش‌اوغلو، رسمی گؤروشمه‌لر اوچون ماجاریستانین باشکندی بوداپسته گئتدی.
باخان چاووش‌اوغلو، ماجاریستان دیش‌ایشلری و خاریجی تیجارت باخانی پیتر سیارتو ایله گؤروشدو.
گؤروشمه‌دن سونرا خاریجی ایشلر باخانی مؤولود چاووش‌اوغلو، ماجاریستان‌لی قونومداشی پیتر سیارتو ایله اورتاق بیر آچیقلاما وئردی.
تورکیه‌نین و آوروپا گونده‌مین‌ده‌کی بیر چوخ قونونو مذاکیره ائتدیکلرینی وورغولایان چاووش‌اوغلو، ایکی‌لی ایلیشکی‌لری گلیشدیره‌جکلرینی ایفاده ائدرک،
"آفریکا ایله ده امکداشلیغیمیزی گوجله‌ندیرمک اوچون چالیشیریق" دئدی.
چاووش‌اوغلو، ارمنیستان‌دا باش وئره‌نلرله باغلی،
"بیز دونیانین هاراسیندا اولورسا اولسون چئوریلیش و چئوریلیش گیریشیملرینه قارشیییق. ارمنیستان‌دا اولان بو وضعیتی ده شدتله قیناییریق. سئچیم ایله ایش باشینا گلمیش حکومته استعفا چاغری‌سی قبول ائدیلمز. بؤلگه اؤلکه‌لری ایله ده نه ائده‌بیله‌جگیمیزی دانیشیریق. چئوریلیش گیریشیمی، اؤلکه ثابیتلیگینی پوزان آددیملاردیر. تورکیه‌نین بو توتومو ایلکه‌لی بیر توتوم‌دور، چئوریلیشه قارشیییق" ایفاده‌لرینی ایشلتدی.
ارمنیستان باش قرارگاه رئیسی اونیک گاسپاریان و یوکسک روتبه‌لی عسگرلر، باشباخان نیکول پاشینیانی استعفایا چاغیران بیر بیلدیری یاییملادیلار. پاشینیان ایسه اؤلکه‌ده چئوریلیش گیریشیمی اولدوغونو سؤیله‌رک، باش قرارگاه رئیسی گاسپاریانی گؤره‌ودن آلدیغینی آچیقلادی.
