میللی تهلوکه‌سیزلیک شوراسی‌نین ایجلاسیندان سونرا بیانات یاییلیب

میللی تهلوکه‌سیزلیک شوراسی تورکیه-‌نین اگه، دوغو آغ دنیزی ایله قیبریس-دا اولوسلار آراسی حقوق‌لارا اساس‌لانان ماراق‌لارینی قوروماقدا قرارلی اولدوغونو وورغولاییب.

جمهور باشقانی رجب طیب اردوغانین باشچیلیغیندا پرزیدنت ساراییندا کئچیریلن میللی تهلوکه‌سیزلیک شوراسی ایجلاسیندان سونرا بیانات یاییلیب.

بیاناتدا ییغینجاقدا بؤلگه‌دکی غیری-ثابیتلیگین اساس قایناغی اولان ترور تشکیلات‌لاری‌نین تورکیه-‌نین گونئی سرحدینده‌کی قونشولارینین تورپاق‌لارینداکی مؤوجودلوغونا سون قویماق اوچون آتیلان آدیم‌لارین دا موذاکیره اولوندوغو و مسئله ایله علاقه‌لی بوتون اولوسلار آراسی گوجلرین وظیفه‌لرینی یئرینه یئتیرمه‌یه دعوت ائدیلدیگی وورغولانیب.

بیاناتدا تورکیه-‌نین اگه، دوغو آغ دنیزی ایله قیبریس مسئله‌سی‌نین حلینده هر پلاتفورمادا ایلکین اولا‌راق دیپلماسی و دیالوق‌دان طرف اولوندوغو قئید ائدیلیب: اؤلکه‌میزین اولوسلار آراسی حقوق و موقاویله‌لره اساس‌لانان حقوق‌لارینی، ماراق‌لارینی و منافع‌لرینی قوروماقدا قرارلی اولدوغو بیر داها وورغولانمیش‌دیر.

بیاناتدا آیریجا باشدا سوما‌لی اولماقلا افریقا و دییشیک جغرافیا‌لارداکی ترور و زوراکی‌لیق حادثه‌لری قینانا‌راق، تورکیه-‌نین باریش اوچون مسئولیت‌لرینی یئرینه یئتیرمه‌یه داوام ائدجگی بیلدیریلیب.