مصطفی شنتوپ: "ائرمنیستان محاربه جینایتی تؤرهدیر"
شنتوپ رسمی سفرده اولدوغو آذربایجاندا آچیقلاما وئریب.
تورکیه بؤیوک میللت مجلیسی صدری مصطفی شنتوپ ائرمنیستانین سیویل لره هوجوم ائدهرک محاربه جینایتلری تؤرتدیگینی سؤیلهییب.
شنتوپ رسمی سفرده اولدوغو آذربایجاندا آچیقلاما وئریب.
شنتوپ ائرمنیستانین دستکلدیگی ترور تشکیلاتلارینین داواملی اولاراق آذربایجانین سیویل یاشاییش یئرلرینه هوجوم ائتدیگینی و آذربایجان اوردوسونون ایشغال اولونموش اراضیلری آزاد ائتمک اوچون عملیات باشلاتدیغینی بیلدیریب.
شنتوپ آذربایجانین بمت نیظامنامهسینین 51-جی مادهسیندکی "اؤزونومودافعه" حقوقونون طلبلرینی یئرینه یئتیردیگینی وورغولاییب و آذربایجان اوردوسونون عملیاتلاریندا اولوسلار آراسی حقوقا اویغون حرکت ائتدیگینی و یالنیز حربی هدفلرله موباریزه آپاردیغینی وورغولاییب.
ائرمنی قوهلرینین سیویل لری بومبالادیغینی خاطیرلادان شنتوپ دئییب:
"آذربایجان اولوسلار آراسی حقوقا و محاربه اخلاقینا اویغون حرکت ائدیر. ائرمنیستان بونو ائتمیر. محاربه قانونلارینا عمل ائتمهین، سیویل اهالینی هدف آلان و بومباردمان ائدن بیر دؤولتدن آتشکسه رعایت ائتمهسینی گؤزلمک ده آبسورددور".
شنتوپ بیلدیریب کی، ائرمنیستان مسکوا-دا الده اولونان اینسانی آتشکس راضیلاشماسینی کوبود شکیلده پوزاراق سیویل اهالینی هدفه آلماقدا داوام ائدیر. بو هوجوملار، سیویل اهالینین هدفه آلینماسی، سؤزون اصل معناسیندا، محاربه جینایتلریدیر. ائرمنیستان آرتیق قلوبال بیر پروبلئمه چئوریلیب.
آذربایجانین مقدس موباریزه آپاردیغینی سؤیلهین شنتوپ یالنیز تورک دؤولتینین دئییل، 83 میلیون تورک خالقینین دا داغلیق قاراباغ باشدا اولماقلا ایشغال اولونموش اراضیلرین آزاد ائدیلمهسی اوغروندا موباریزنی دستکلهدیگینی وورغولاییب.