اردوغان: چیخاریب آتماق‌دا قرارلیییق
"بیز اگمن‌لیگی قیدسیز شرط‌سیز میللتینه عاید بیر اؤلکه‌ییک"
جمهورباشقانی رجب طیب اردوغان، اگمن بیر دؤولت اولان تورکیه‌نین، روس اس ۴۰۰ سیستمینی ساتین آلماق‌دان واز گئچمه‌سینی هئچ کسین ایستمه‌دیگینی وورغولادی.
اردوغان، گون اورتا ساعتلارین‌دا گئتدیگی روسیادا، پرزیدنت ولادیمیر پوتین ایله، تورکیه-روسیا ۸.جی یوکسک سویه‌لی امکداش‌لیق توپلانتیسینا باشقانلیق ائتدی.
ایکی لیدئر، داها سونرا اورتاق مطبوعات کنفرانسی گرچکلشدیردی.
چیخیشین‌دا، "سوریه‌نین قوزئیینده اؤلکه‌میزین گوونلیگی ایله سوریه‌نین تورپاق بوتؤولویونه تهلوکه یاراداجاق بیر قورولوشا گؤز یوممایاجاغیمیزی ایفاده ائتدیک" دئیه‌ن اردوغان،
"روسیا ایله مشترک آنلاییش اساسین‌دا میللی گوونلیگیمیزه قصد ائدن ترور مرکزلرینی سوریه‌دن چیخاریب آتماق‌دا قرارلیییق" ایفاده‌لرینی ایشلتدی.
سوریه‌ده آنایاسا کمیته‌سینین ان قیسا مدت‌ده فعالیته گئچیریلمه‌سی قونوسون‌داکی قرارلیلیقلارینی دا تکرار ائتدیکلرینی قید ائدن پرزیدنت،
"سوریه و بؤلگه‌سل مسئله‌لره دایر دانیشیقلار آپاردیق. آمریکانین چکیلمه قرارینی دگرلندیردیک. ادلب با‌شدا اولماقلا بؤلگه‌ده‌کی پروسه‌لری دانیشدیق. قارشی‌داکی دؤورده اورتاق آتاجاغیمیز آددیملار حاقیندا مشورت ائتدیک" دئدی.
روسیانین، تورکیه‌نین تیجارت اورتاقلاری آراسیندا اوچونجو سیرادا اولدوغونو دا بیلدیره‌ن اردوغان، انرژی ساحه‌سین‌ده‌کی تورک-روس امکداشلیغینین اقتصادی ایلیشکیلرین داشیییجی سوتونلارین‌دان بیری اولدوغونو ایفاده ائتدی.
تورکیه‌نین، روس موشک ساوونما سیستمی اس ۴۰۰ ساتین آلینماسینا واشینگتن رهبرلیین‌دن گلن تنقیدلره دایر بیر سوالا ایسه اردوغان،
"۳.جو طرفلری راحاتسیز ائدر می ائتمز می. بیز اگمن‌لیگی قیدسیز شرط‌سیز میللتینه عاید بیر اؤلکه‌ییک. اگمنلیک حاقلاریمیزا کیمینسه سؤز ائتمه‌سینه ایمکان وئرمریک. او زامان میللت، دؤولت اولماز. اس-۴۰۰ مسئله‌سین‌ده یول خریطه‌میزی تعیین ائتمیشیک، آددیملاریمیزی آتمیشیق. هر شئی بیتمیش، ایندی بیزدن قالخیب دا بورادان واز گئچ دئیه توصیه‌لر وئرنلر دئمک کی، بیزی ده تانیمیر اولاجاقلار. بیز بو مسئله ایله باغلی اولاراق بیر شئیین سؤزلشمه‌سینی ائدیریک‌سه بو ایش بیتمیش‌دیر. اونا گؤره یولوموزا داوام ائدجییک. بو بیزیم اگمنلیک حاقیمیزدیر. بون‌دان واز گئچمه‌میزی کیمسه بیزدن ایسته‌یه‌بیلمز" جاوابینی وئردی.
ایلگیلی‌لی خبرلر
جمهور باشقانی اردوغان و قاسیم جومرت توکایئو آراسیندا تلفون دانیشیغی اولوب
تورکیه پرزیدنتی رجب طیب اردوغان قازاخیستان پرزیدنتی قاسیم جومرت توکایئوله تلفون علاقه‌سی ساخلاییب.
