ورشودا اردوغانین ایکی طرف‌لی گؤروش‌لری
تورکیه‌نین دؤولت باشچی‌سی رجب طیب اردوغانین ناتو ذیروه توپلانتیسیندا دوردوغو اساس مسئله‌لر تررورلا موباریزه و سوریه‌‌داکی دؤیوش‌دن قایناق‌لی تورکیه‌یه ایستیقامت‌لی تهدیدلرله باغلی اولوب .
تورکیه‌نین سوریه‌‌داکی دؤیوشون سونا چاتدیریلماسی، قاچقین بحرانی‌نین حل ائدیلمه‌سی، دائش و بنزر تررور تشکیلات‌لارینا قارشی موباریزه‌ده اردوغان ناتو عضوو و دیگر اورتاق اؤلکه‌لرین ده اوزرینه مسئولیت و یوک پایلاشیلماسی‌نین دوشدوگونو وورغولاییب.
تورکیه‌نین دؤولت باشچی‌سی توپلانتی‌دا بیر چوخ ایکی‌طرف‌لی گؤروش‌لر رئاللاشدیریب. توپلانتی‌نین ایلک گونو اوکراینا، آذربایجان، فینلاندیا، بوسنی و هرزگوین دؤولت باشچی‌لاری ایله گؤروش‌لری اولوب. توپلانتی نین ایکینجی گونو ایسه آلمانیا کانسلئری آنگلا مرکل، اینگیلتره‌نین باش ناظری دئوید کمرون، او جمله‌دن آمریکا، کانادا، بلغارستان، ایتالیا، فرانسا، لیتوا دؤولت رهبرلری ایله آیاقوستو صحبت‌لر ائدیب.
اردوغان-کمرون صحبتینده اینگیلتره‌نین رفرئندوملا آوروپا اتفاقین‌دان چیخما قراری موذاکیره ائدیلیب. اینگیلتره وطنداش‌لاری طرفین‌دن وئریلن قرارا تورکیه‌نین دؤولت باشچی‌سی هم حؤرمتینی بیلدیریب، هم ده تأسف حیس‌ینی چاتدیریب.
مرکل-اردوغان گؤروشونده ایسه ناتو مؤوضولاری باره‌ده دانیشیلیب. مرکل، عینی زاماندا، تورکیه باشچی‌سینا آوروپا اتفاقی قارشی‌سیندا بوینونا گؤتوردوگو مسئولیته گؤره تشککورونو بیلدیریب. اما اردوغان آلمانیا پارلامئنتینده قبول ائدیلن ائرمنی لاییحه‌سینه گؤره تورکیه‌نین ناراحات‌لیغینی دیله گتیریب. مرکل ایسه قارشیلیغیندا قرارین تورکیه-آلمانیا موناسیبت‌لرینه کؤلگه سالماماسی اوچون چالیشا‌جاق‌لارینی دئییب.
ناتو-نون باش کاتیبی ینس اشتولتنبرگ‌ده رجب طیب اردوغانلا ائتدیگی آیاقوستو صحبتده تورکیه‌نین مدافعه‌سیله باغلی فیکیر و تؤوسویه‌لره قاتیلدیغینی بیلدیریب.
آمریکا پرزیدنتی باراک اوباما ایله صحبتینده ایسه اردوغان آمریکادا یاشانان سون حادثه‌لرله علاقه‌دار باش‌ساغ‌لیغی وئریب، کدرینی دیله گتیریب.
ایلگیلی‌لی خبرلر
جمهور باشقانی اردوغان و قاسیم جومرت توکایئو آراسیندا تلفون دانیشیغی اولوب
تورکیه پرزیدنتی رجب طیب اردوغان قازاخیستان پرزیدنتی قاسیم جومرت توکایئوله تلفون علاقه‌سی ساخلاییب.
