اورتا آسیا اؤلکهلری آمریکانین "یوکسک ریسکلی اؤلکهلره" لیستینه گیریب
آمریکا تیجارت ناظیرلیگی قازاقیستان و قیرقیزیستان دا داخیل اولماقلا اورتا آسیا اؤلکهلرینه آتشلی سیلاح، ساواش مهماتی و سیلاح پارچالارینین ایخراجی قایدالارینی سرتلشدیریب
آمریکا تیجارت ناظیرلیگی آوریلین 26-دان اعتباراً "یوکسک ریسکلی اؤلکهلره" آتشلی سیلاح، ساواش مهماتی و سیلاح پارچالارینین ایخراجی قایدالارینی سرتلشدیریب. سؤزوگئدن اؤلکهلر آراسیندا قزاقیستان، قیرقیزیستان و تاجیکیستان دا وار.
لیسانسلاشدیرما سیاستینده ائدیلن تنظیملمه ایله «بؤلگهسل ایستیقرارسیزلیغی قیزیشدیرماق، نارکوتیک تیجارتی، اینسان حاقلارینین پوزولماسی، سیاسی ایغتیشاشلار و آمریکانین میللی تهلوکهسیزلیگینی تهدید ائدن دیگر حرکتلر» ریسکی مینیموما ائندیریلهجک.
بو محدودیتلر یالنیز اؤزل شیرکتلرله باغلانان موقاویلهلره شامیل ائدیلهجک و می آیینین 30-دان قووهیه مینهجک.
آمریکا تیجارت ناظیرلیگینین یاراتدیغی «یوکسک ریسکلی اؤلکهلر» لیستینه لاتین آمریکا (۱۶ اؤلکه)، آفریقا و گونئی دوغو آسیا (سککیز اؤلکه)، همچینین قزاقیستان، قیرقیزیستان و تاجیکیستان دا داخیل اولماقلا اورتا آسیا اؤلکهلری داخیلدیر. بیلدیریلیر کی، لیست یارادیلارکن ترور حرکتلری ریسکی، اختلاس سویهسی، اینسان حوقوقلارینین حیاتا کئچیریلمهسی و سیاسی ایستیقرار کیمی معیارلار نظره آلینیب.
یئنی سیاسته اساساً، آمریکا تیجارت ناظیرلیگی لیستدهکی اؤلکهلرین موافیق شیرکتلرینین سورغولارینی اتوماتیک اولاراق رد ائده بیلهجک. بوندان علاوه، آمریکا مسئوللاری ایخراج ائدیلن سیلاحلارین نئجه ایستیفاده ائدیلدیگینه دایر معلوماتلارین توپلانماسیندا داها دقتلی اولماق و ایخراج لیسانسلارینین مودتینی 4 ایلدن 1 ایله ائندیرمک نیتیندهدیر.