جمهورباشقانی علییئو "آنیدقبیر"ی زیارت ائتدی
"تۆرک دونیاسینین بؤیوک اؤولادی، قابیلیتلی کوماندیر و داهی لیدئر غازی مصطفی کمال آتاتۆرکون عزیز خاطرهسینی ان صمیمی سایغی و احتراملا آنیرام"
آذربایجان جمهورباشقانی ایلهام علییئو، اؤلکهسینده ۷ فوریهده تشکیل ائدیلهن جمهورباشقانی سئچیمینین آردیندان ایلک رسمی سفری اوچون تۆرکیهیه گلدی.
علییئو، یانینداکی هیئتله ایلک اولاراق تۆرکیه جمهوریتینین قوروجوسو مصطفی کمال آتاتۆرکون مزارینین اولدوغو "آنیدقبیر"ی زیارت ائتدی.
غازی مصطفی کمال آتاتۆرکون آنیدینا چلنگ بوراخاراق بورادا سایغی دوروشو گئرچکلشدیرن علییئو، آنیدقبیر دفترینی ایمضالادی.
ایلهام علییئو، دفتره بونلاری یازدی:
"تۆرک دونیاسینین بؤیوک اؤولادی، قابیلیتلی کوماندیر و داهی لیدئر غازی مصطفی کمال آتاتۆرکون عزیز خاطرهسینی ان صمیمی سایغی و احتراملا آنیرام. اولو اؤندر مصطفی کمال آتاتۆرک، یوز ایل اؤنجه ان مؤحتشم اثری تۆرکیه جمهوریتینی قورماقلا آدینی دونیا تاریخینین صفحهلرینه و خالقینین اۆرهگینه قیزیل حرفلرله ابدی اولاراق یازمیشدیر. مصطفی کمال آتاتۆرکون قوروجوسو اولدوغو دؤولتین بو گونکو گلیشیم سویهسینی، رفاهینی، قدرتینی و کۆرهسل عالمدهکی نفوذونو گؤرمکدن قارداش آذربایجانین جمهورباشقانی اولاراق اؤزل غرور دویورام.
خالقلاریمیزین ان بؤیوک ثروتی اولان سارسیلماز آذربایجان-تۆرکیه قارداشلیق، بیرلیک و دایانیشماسینی قوروماق و گلهجک نسیللره آرماغان ائتمک، استراتژیک متفیقلیگیمیزی هر طرفلی گلیشدیرمک و گۆجلهندیرمک، ایکی اؤلکهنین قارشیسیندا دوران ان عالی وظیفهدیر. آذربایجانین سئوینجینی اؤز سئوینجی، کدرینی اؤز کدری بیلهن بؤیوک شخصیت غازی مصطفی کمال آتاتۆرکون عزیز خاطرهسی، آذربایجان خالقینین اۆرهگینده دایما یاشایاجاق. روحو شاد اولسون!".
داها سونرا جمهورباشقانی رجب طیب اردوغان، جمهورباشقانلیغی ساراییندا علییئوی رسمی مراسیمله قارشیلادی.
مراسیم سونراسی باش باشا گؤروشمهیه گئچهن اردوغان و علییئو، هیئتلر آراسی گؤروشمهیه باشقانلیق ائدجک، اورتاق مطبوعات کنفرانسی تشکیل ائدجک.