آذربایجاندان ایتن وطنداشلاری اوچون ارمنیستانا چاغری

آذربایجان، ۱.جی قاراباغ ساواشیندا ایتن وطنداشلارینین عاقیبتینین تعیین اولونماسی اوچون ارمنیستانلا امکداشلیغا حاضر اولدوغونو آچیقلادی.

آذربایجان اسیر، ایتکین و گیروو آلینمیش وطنداشلاردان مسئول دؤولت کمیسیونوندان ائریله‌ن آچیقلامادا، ۱۹۹۰.جی ایللرین باشلارینداکی ۱.جی قاراباغ ساواشیندا آذربایجان‌لی ۳ مین ۸۹۰ عسگر و وطنداشین ایتدیگی، بونلاردان یالنیز ۲۵ینین جسدینین تثبیت ائدیلدیگی ایفاده ائدیلدی.

ارمنیستانین ایلگیلی قوروموندان، عسگری عملیاتلاردا ایتن شخصلرین عاقیبتینین تعیین اولونماسیندا امکداشلیغا حاضر اولدوقلارینا دایر بیانلارین ائدیلدیگی، بونون دا آذربایجان طرفیندن ممنونیتله قارشیلاندیغی بیلدیریله‌ن آچیقلامادا، آذربایجانین بو ایستیقامتده‌کی چابالارین بیرلشدیریلمه‌سیندن یانا اولدوغو قید ائدیلدی.

آچیقلامادا، "ایتکینلریمیزین دفن یئرلرینین آختاریلماسی سۆره‌جینه، توپلو مزارلارین یئرلری حاقیندا یئترلی بیلگییه صاحب اولان و ۱۹۹۴.جو ایله قدر ارمنیستانین عسگری عملیاتلارینی ایجرا ائد‌ن باشچیلارین و دیگر سمسئوللارین داخیل ائدیلمه‌سی لازیمدیر. هر ایکی طرفه عاید ایتکین شخصلرین آختاریلماسی اوچون آچیقلیق و شفافلیق ایلکه‌لرینی گۆده‌رک و قارشیلیقلی گۆوه‌ن اورتامیندا ارمنیستانین ایلگیلی قوروملارییلا امکداشلیغا حاضیریق" ایفاده‌لری یئر آلدی.

کومیسیونون آچیقلاماسیندا آیریجا آذربایجان طرفینین ۲.جی قاراباغ ساواشیندان سونرا ۱۷۱۳، ۱۲-۱۴ سپتامبر ۲۰۲۲ده‌کی چاتیشمالاردان سونرا ۱۵۷، ۱۹ سپتامبر ۲۰۲۳ده‌کی آنتی‌ترور عملیاتیندان سونرا ایسه ۱۷۳ جسدی ارمنیستانا قایتاردیغی بیلگیسی پایلاشیلدی.