روسیانین داشکند ائلچیسی باخانلیغا چاغریلدی
روسیانین داشکند ائلچیسی، روس سیاستچی زاخار پریلپینین روسیانین اؤزبکیستان تورپاقلارینی "ایلحاق ائتمهسی" یولونداکی آچیقلاماسی ایله باغلی باخانلیغا چاغیریلدی
اؤزبکیستان خاریجی ایشلر باخانلیغی، روسیانین داشکند ائلچیسینی، روس سیاستچی زاخار پریلپینین روسیانین اؤزبکیستان تورپاقلارینی "ایلحاق ائتمهسی" یولونداکی آچیقلاماسی ایله باغلی باخانلیغا چاغیردی.
خاریجی ایشلر باخانلیغیندان وئریلهن آچیقلامادا، گؤروشمهده "عدالتلی بیر روسیا-حقیقت اوچون" پارتیسی ائش باشقانی زاخار پریلپینین "روسیانین اؤزبکیستان تورپاقلارینی ایلحاق ائتمهسی" یولونداکی آچیقلاماسینین قصدلی بیر تخریبات اولدوغو و ایکی اؤلکه خالقلاری آراسینداکی ایلیشکیلره منفی تأثیر ائدهبیلهجگینین روس طرفینه چاتدیریلدیغی ایفاده ائدیلدی.
آچیقلامادا، پریلپینین آچیقلاماسینین اؤزبکیستاندا درین راحاتسیزلیقلا قارشیلاندیغی، روسیا کیمی دوست بیر اؤلکهنین پارتی لیدئرلرینین بو جور تلهسیک آچیقلامالارینین اؤزبکیستان ایله روسیا آراسینداکی گئنیش استراتژیک اورتاقلیق و متفیقلیک روحونا اویغون گلمهدیگی وورغولاندی.
ائلچی مالگینوو دا پریلپینین آچیقلامالارینین "دوست و باغیمسیز" اؤزبکیستان ایله باغلی روسیا رهبرلیگینین رسمی توتومونو عکس ائتدیرمهدیگینی ایفاده ائدرک، روسیا خاریجی ایشلر باخانلیغینین یاخین زاماندا حادثه ایله باغلی آچیقلاما وئرمهیی پلانلادیغینی دیله گتیردی.
اؤته یاندان اؤزبک میللت وکیللری، خاریجی ایشلر باخانلیغیندان، روسیایا نوتا/اعتراض یازیسی گؤندریلمهسینی و اؤزبکیستانین آنایاسال سیستمینه قارشی چیخمانین بیر جزایی مسئولیت قونوسو اولدوغو یولوندا اویاری وئریلمهسینی طلب ائتدی.
روس سیاستچی پریلپین، تشکیل ائتدیگی بیر مطبوعات کنفرانسیندا، اؤزبکیستانین و اسکی سووئت سوسیالیست جمهوریتلر بیرلیگینین دیگر بؤلگهلرینین روسیا طرفیندن ایلحاق ائدیلمهسینی تکلیف ائتمیشدی.
ایلگیلیلی خبرلر
آذربایجان باشباخانی تورکیهده
آذربایجان باشباخانی، جمهورباشقانی رجب طیب اردوغان طرفیندن ده قبول ائدیلهجک