جمهورباشقانی تاتاردان بیرلشمیش میللتلره چاغری

قوزئی قیبریس تورک جمهوریتی جمهورباشقانی ارسین تاتار، بیرلشمیش میللتلرین قوزئی قیبریس تورک جمهوریتی ایله بیر آنلاشماسی اولماماسینین قبول ائدیله‌بیلمه‌یه‌جک مرحله‌یه گلدیگینی سؤیله‌دی.
آدادا گؤروشمه‌لرده اولان بیرلشمیش میللتلر باش کاتیبینین باریش عملیاتلاریندان مسئول کؤمکچیسی ژان-پیر لاکروا، قوزئی قیبریس تورک جمهوریتینین باشکندی لئفکوشادا جمهورباشقانی ارسین تاتار طرفیندن جمهورباشقانلیغی اوفیسینده قبول ائدیلدی.
تاتار، گؤروشمه‌نین آردیندان تشکیل ائتدیگی مطبوعات کنفرانسیندا، لاکروایا قیبریسده ایکی دؤولت اولدوغونو و بورادا فعالیتلرینی داوام ائتدیره‌جکلرسه، قوزئی قیبریس تورک جمهوریتی ایله ده بیر آنلاشما متنی ایمضالامالاری لازیم اولدوغونو چاتدیردیغینی سؤیله‌دی.
بونا یاناشیمین اولوملو اولدوغونا ایشاره ائد‌ن ارسین تاتار، بیرلشمیش میللتلر طرفیندن قیبریس اوچون تعیین ائدیله‌جک نماینده‌نین آنجاق طرفلرین طلبلرینی چاتدیراجاق طرفسیز، صلاحیتلری محدود و معین بیر مدته وظیفه‌له‌ندیریله‌جک "فردی نماینده" شکلینده اولابیله‌جگینی قید ائتدی.
تاتار، دوغرودان بیرلشمیش میللتلر گوونلیک شوراسینا باغلی اولوب، فدرال اساسلی بیر آنلاشما اوچون موذاکیره زمینه‌سی آراشدیرماسی ائد‌جک اؤزل بیر نماینده مدلینی رد ائد‌جکلرینی سؤیله‌دی.
جمهورباشقانی تاتار، قیبریسده قالیجی، داوام ائتدیریله‌بیلیر و عدالتلی بیر آنلاشمانین، اگمن ائشیدلیک و ائشید اولوسلارآراسی ایستاتوسون قبولوندان گئچدیگینی تکرارلایاراق،
"بیرلشمیش میللتلرین قوزئی قیبریس تورک جمهوریتی ایله بیر آنلاشماسی اولماماسی آرتیق بیزیم اوچون قبول ائدیله‌بیلمه‌یه‌جک بیر آشامایا گلدی" ایفاده‌سینی ایشلتدی.
لاکروا ده گؤروشمه‌نین آردیندان وئردیگی آچیقلامادا، هر ایکی طرفله ده یاخین ایش بیرلیگی ایچریسینده اولماغی داوام ائتدیره‌جکلرینی ایفاده ائتدی.