جمهورباشقانی علییئودن فرانسایا سرت تپکی

آذربایجان جمهورباشقانی ایلهام علییئو، فرانسانین، ۱،۵ میلیون الجزایرلینی یالنیز الجزایرلی و مسلمان اولدوقلاری اوچون یوخ ائتدیگینی سؤیله‌دی.
ایلهام علییئو، باغیمسیز دؤولتلر توپلولوغونا عضو اؤلکه‌لرین استخبارات و میللی گوونلیکدن مسئول قوروملارینین باشقانلارینی قبول ائتدی.
قبولدا دانیشان علییئو، باتیدا بعضی اؤلکه‌لرین اؤز تورپاقلارینی قورتاران آذربایجانی "ایشغالچی"، آذربایجان تورپاقلارینی ایللرجه ایشغال آلتیندا توتان ارمنیستانی ایسه "قوربان" اولاراق گؤسترمه چاباسی ایچینده اولدوغونو، بو ایشده باشی فرانسانین چکدیگینی ایضاح ائتدی.
فرانسا جمهورباشقانینین آذربایجانین اولوسلارآراسی حقوقو پوزدوغو یولونداکی ادعالارینی گولونج اولاراق تانیملایان علییئو، بو ایفاده‌لری ایشلتدی:
"فرانسا، ۱،۵ میلیون الجزایرلینی یالنیز الجزایرلی و مسلمان اولدوقلاری اوچون یوخ ائتدی. بو سوی‌قیریمدیر. فرانسانین آفریقادا و دونیانین دیگر بؤلگه‌لرینده‌کی قانلی جینایتلریندن دانیشمیرام بئله. فرانسانین بو گون بئله موستملکه‌لره صاحب اولماسی عاغلا سیغمیر. بو گون نه قدر چالیشسالار دا بعضی آفریقا اؤلکه‌لرینین قورتولابیلمه‌دیگی بو اؤلکه، بیزی بین‌الخالق حقوقو پوزماقلا سوچلاییر. بو آبسورددور".
بعضی اؤلکه‌لرین آذربایجان ایله ارمنیستان آراسیندا آرا‌چی اولماق ایسته‌دیگینی سؤیله‌یه‌ن علییئو، "غرضلی اولمایان آرا‌چیلاری قبول ائدریک. آنجاق بوتون دیپلوماتیک قایدالاری پوزا‌ن، تحقیر احتیوا ائد‌ن آچیقلامالاردا، چیرکین اویدورمالار، تخریباتلار و یالانلاردا اولان فرانسانین آراچیلیق چابالاری منطق چرچیوه‌سینه سیغمیر. بیزه بئله آراچی لازیم دئییل" دئدی.
آذربایجان اولاراق ارمنیستانلا ایلیشکیلرین نورماللاشدیریلماسینا حاضر اولدوقلارینی وورغولایان ایلهام علییئو، "باریش آنلاشماسی اوزرینده ایشه داوام ائتمه‌یه حاضیریق. اگر ارمنیستان روسییانین آراچیلیغینی رد ائتسه، آذربایجان و ارمنیستان خاریجی ایشلر باخانلاری آراسیندا بیر باشا موذاکیره‌لرین بیر آلتئرناتیو اولابیله‌جگینی دوشونوره‌م" ایفاده‌لرینی ایشلتدی.