پئسکوودان قاراباغداکی روس باریش گوجو ایله باغلی آچیقلاما

روسیا دؤولت باشقانلیغی سارایی (کرملین) سؤزچوسو دمیتری پئسکوو، آذربایجانین قاراباغ بؤلگه‌سینده‌کی روس باریش گوجونون وضعیتینین باکی یؤنه‌تیمی ایله گؤروشوله‌جیگینی بیلدیردی.
پئسکوو، ژورنالیستلرین، قاراباغ‌داکی روس باریش گوجونون عاقبتی ایله باغلی سوالینی جاوابلاندیردی.
روس عسگرلرینین فعلی و حقوقی اولاراق آذربایجان تورپاقلاریندا اولدوغونا دقت چکه‌ن پئسکوو، بونو ارمنیستان باشباخانی نیکول پاشینیانین دا بیلدیگینی دیله گتیردی.
پئسکوو، "اونلارین داها سونراکی قالیش فورمولو و ایلگیلی بوتون اصوللارا گلینجه، او زامان بو البته آذربایجان طرفی ایله دانیشیلاجاق" ایفاده‌سینی ایشلتدی.
روسیانین ارمنیستان ایله ده تماسلارینی داوام ائتدیرجگینی بیلدیرن سؤزچو پئسکوو، پاشینیان ایله روسیا دؤولت باشقانی ولادیمیر پوتینین سون ائتدیگی تلفن دانیشماسیندا، روس گوجلرینین یئنیدن قونوشلاندیریلماسییلا باغلی دانیشیلمادیغینی قید ائتدی.
پئسکوو، ژورنالیستلرین، "دیگر بعضی اؤلکه‌لر کیمی حماسی ترور هؤرگوتو اولاراق تانییاجاقسینیز می؟" سوالینا ایسه،
"چاتیشمانین طرفلری ایله تماسیمیزی داوام ائتدیریریک. هم اورادا هم ده دیگر یئرده روس وطنداشلاری وار. روس وطنداشلارینین عاقیبتی، بیر نؤمره‌لی اؤنجه‌لیگیمیز. روسیا، وضعیتی دقتلی بیر شکیلده آنالیز ائدیر. حل سوره‌جینه قاتیلما پتانسیلی اولان بیر اؤلکه اولاراق روسیا، توتومونو قورویور" جاوابینی وئردی.
اسرائیل-فلیسطین مسئله‌سینده، روسیانین رولویلا باغلی پئسکوو، بونلاری قید ائتدی:
"گئرچک چؤزومده، روسیانین رولو حاقیندا دانیشماق اوچون هله چوخ ائرکه‌ن چونکو چاتیشما، ایستی ساواش مرحله‌سینده. وضعیت قایغی وئریجی، پتانسیل اولاراق چوخ تهلوکه‌لی و اینسانی نتیجه‌لر ده داخیل اولماق اوزره تهلوکه‌لی. ترور سالدیریلارینی دوردورمامیز لازیمدیر. متناسیب اولمایان گوج ایستیفاده‌سینی دوردورمامیز لازیمدیر. غزه‌ده خالقین مینیموم احتیاجلارینی قارشیلامامیز لازیمدیر".
حماسین عسگری قانادی قسام توغایلاری، جمعه‌ائرته‌سی گونو اسرائیله "الاقصی توفانی" آدلی احاطه‌لی بیر سالدیری باشلاتدیغینی بیلدیرمیشدی. غزه‌دن اسرائیله مینلرجه راکت آتیلارکه‌ن سلاحلی قروپلار دا بؤلگه‌ده‌کی یئرله‌شیم یئرلرینه گیرمیشدی.
اسرائیل اوردوسو دا ساواش اوچاقلاری ایله غزه‌یه دمیر قیلینجلار عملیاتی باشلاتدیغینی آچیقلامیشدی. 
آرتان گرگینلیکده هر ایکی طرفدن یوزلرجه جان ایتکیسی وار.