تاتار تورکو روستم عمروو اوکراینانین ساوونما باخانی اولدو

اوکراینا ساوونما باخانی اولئکسی رئزنیکوو، پارلمان (وئرخوونا رادا) باشقانینا استعفا یازیسینی سوندوغونو آچیقلادی.
رئزنیکوو، سوسیال مئدیا حسابین‌دان ائتدیگی پایلاشیمدا، وظیفه‌سیندن استعفاسینا باغلی آچیقلاما وئردی.
وئرخوونا رادا باشقانی روسلان ستفانچوکا استعفا عریضه‌سینی سوندوغونو ایفاده ائد‌ن رئزنیکوو،
"اوکراینانین مدرن تاریخینین ان چتین دؤنمی اولان سون ۲۲ آی بویونجا اوکراینا خالقینا خیدمت ائتمک و اوکراینا اوردوسو اوچون چالیشماق بیر غرور ایدی" ایفاده‌سینی ایشلتدی.
اوکراینا دؤولت باشقانی ولودیمیر زلنسکی، قیریم تاتار تورکو روستم عمرووو ساوونما باخانی اولاراق آتاما قراری آلدیغینی آچیقلامیشدی.
زلنسکی، سوسیال مئدیا حسابیندان ائتدیگی پایلاشیمدا،
"اوکراینا ساوونما باخانینی دییشدیرمه قراری آلدیم. اولئکسی رئزنیکوو، ۵۵۰ گوندن چوخ سوره‌ن گئنیش مقیاسلی ساواشی یاشادی. باخانلیغین هم اوردویا هم ده توپلوما دایر یئنی یاناشمالارا و یئنی تعال بیچیمینه احتیاجی اولدوغونا اینانیرام. ایندی باخانلیغین باشینا روستم عمروو گئچمه‌لیدیر" ایفاده‌لرینی ایشلتمیشدی.
زلنسکی، پارلمانین سؤزو گئدن قراری دستکله‌یه‌جگینی اومود ائتدیگینی ایفاده ائتمیشدی.
اولئکسی رئزنیکوو، ۲۰۲۱دن بری اوکراینانین ساوونما باخانلیغی وظیفه‌سینی ایجرا ائدیردی.
روستم عمروو کیمدیر؟

۱۹۸۲ دوغولان عمروو، اوکراینا تاریخینده باخانلیق وظیفه‌سینی اوستله‌نه‌جک ایلک قیریم تاتاری اولدو.
قیریم تاتار تورک خالقینین لیدئری و اوکراینا میللت وکیلی مصطفی عبدالجمیل قیریم‌اوغلونون مشاویری اولان عمروو، داها اؤنجه اوکراینا دؤولت مولکیت صاندیغی باشقانلیغی و اوکراینا دؤولت باشقانینین اؤزل نماینده‌سی وظیفه‌سینی آلمیشدی.
دؤولت باشقانینا باغلی اوکراینانین عرب و مسلمان دؤولتلرله تعاملدان مسئول مشاوره شوراسی کمیسری عمروو، فوریه ۲۰۲۲دن بو یانا اوکراینانین روسیا ایله موذاکیره قروپوندا یئر آلیر.