آذربایجان: ارمنیستان وضعیتی گرگینلشدیریر
ارمنیستان مطبوعاتیندا چاتیشمادا ۲ ارمنی عسگرین حیاتینی ایتیردیگی یولوندا خبرلر یایینلانمیشدی
آذربایجان ساوونما باخانلیغی، ارمنیستان اوردوسونون سرحددهکی آذربایجان مؤوضعلرینه آتیش ائدرک بؤلگهدهکی وضعیتی گرگینلشدیردیگینی بیلدیردی.
باخانلیغین آچیقلاماسیندا، ارمنیستان اوردوسونون، باسارگئچر ائلینین زود یئرلهشیم یئری ایستیقامتینده اولان مؤوضعلریندن آذربایجان اوردوسونون کلبجر ایستیقامتیندهکی مؤوضعلرینه فرقلی کالیبرلی سلاحلار، توپلار و کامیکازه اینسانسیز هاوا آراجلارییلا (ایها) سالدیردیغی بیلدیریلدی.
آچیقلامادا، ارمنیستانین بو سالدیرییلا بؤلگهدهکی وضعیتی گرگینلشدیردیگی قید ائدیلدی.
ارمنیستان اوردوسونون ایفاده ائدیلهن بؤلگهیه علاوه ساواش تجهیزاتی و پرسنل گؤندردیگی بیلگیسینه یئر وئریلهن آچیقلامادا، ارمنیستان طرفینین داها چوخ تخریباتا زمین حاضرلاماق آماجییلا یالان خبرلرله اولوسلارآراسی توپلومدا یانلیش قناعت میدانا گتیرمهیه چالیشدیغی بیلدیریلدی.
آچیقلامادا، یارانان گرگینلیک و نتیجهلریندن اؤترو بوتون مسئولیتین ارمنیستانین عسگری و سیاسی رهبرلیگینده اولدوغو ایفاده ائدیلدی.
اؤته یاندان، آذربایجان خاریجی ایشلر باخانلیفی دا یازیلی آچیقلاماییلا ارمنیستانین سالدیریلارینی قینادی.
باخانلیغین آچیقلاماسیندا،
"ارمنیستان طرفیندن اؤلکه ایچینده گرگین سیاسی و اجتماعی وضعیتدن دقتی باشقا ایستیقامته چکمک، عینی زاماندا اولوسلارآراسی توپلومو یانیلتماق مقصدی ایله گئرچکلشدیریلن بو جور حرکتلر، اولوسلارآراسی توپلوم طرفیندن کسینلیکله رد ائدیلمهلی و قینانمالیدیر" ایفادهلری یئر آلدی.
ارمنیستان اوردوسونون سرحددهکی آذربایجان مؤوضعلرینه آتیش ائتمهسی نتیجهسینده ۳ آذربایجان عسگری یارالانمیش، آذربایجان اوردوسو قارشیلیق وئرمیشدی.
ارمنیستان مطبوعاتیندا ایسه چاتیشمادا ۲ ارمنی عسگرین حیاتینی ایتیردیگی یولوندا خبرلر یایینلانمیشدی