جمهورباشقانی علییئو، مکرونلا تلفندا دانیشدی

فرانسا جمهورباشقانی امانوئل مکرون ایله آذربایجان جمهورباشقانی ایلهام علییئو، تلفندا دانیشدی.
آذربایجان جمهورباشقانلیغیندان وئریله‌ن آچیقلامایا گؤره علییئوه تلفن ائدن مکرون، آغدام-خانکندی و لاچین-خانکندی یوللارینین آچیلماسی قونوسونو موذاکیره ائتدی.
علییئو، ارمنیستان و بو اؤلکه‌نین آذربایجانین قاراباغ بؤلگه‌سینده یاراتدیغی و دستکله‌دیگی سؤزده رژیمین، آغدام-خانکندی یولونون ایستیفاده ائدیلمه‌سینه بیلینجلی اولاراق صنعی مانعلر میدانا گتیردیگینی، بونو سیاسی ائتکی آماجی ایله ایستیفاده ائتدیگینی ایفاده ائتدی.
ارمنیستان و سؤزده رژیمین، اولوسلارآراسی قیزیل خاچ کمیته‌سینین آراچیلیغییلا آغدام-خانکندی یولویلا نقلیات قونوسون‌دا واریلان آنلاشمادان امتناع ائتدیگینی سؤیله‌ین علییئو، ایروان رهبرلیگینین آذربایجانلا آنلاشمادان سرحده اینسانی آماجلی اولدوغونو ادعا ائتدیگی یوکلر گتیردیگینی، بونونلا دا سیاسی دئدی-قودو یاراتماغی آماجلادیغینی قید ائتدی.
علییئو، یئنی‌دن قایناشما قونولارینی دانیشماق اوزره قاراباغ‌داکی ارمنی اهالینین نماینده‌لرینی باشکند باکییا و آذربایجانین دیگر شهرلرینه دعوت ائتدیکلرینی، آنجاق اونلارین بونو رد ائتدیکلرینی و وضعیتی قصدلی اولاراق اینسانی گرگینلیک اولاراق سونماغا چالیشدیقلارینی سؤیله‌دی.
آغدام-خانکندی یولونون آچیلماسینین آردیندان آذربایجانین گؤمروک و سرحد رژیمی قوراللارینا اویاراق لاچین-خانکندی یولوندان دا ایستیفاده ائدیله‌بیله‌جگینی بیلدیره‌ن علییئو، دونن آذربایجان قیزیل آیی طرفین‌دن بؤلگه‌یه یئمک یاردیمی چاتدیریلماسی اوچون بیر آراج کروانینین یولا چیخدیغینی خاطیرلاتدی.
مکرون دا وضعیتین ثابتلیگه قوووشدورولماسی و مؤوجود گرگینلیین اورتادان قالدیریلماسینا قاتقی وئرمه‌یه حاضر اولدوقلارینی ایفاده ائد‌رک، فرانسا و آذربایجانین ایلگیلی قوروملاری آراسیندا دانیشیقلارین داوام ائتدیریلمه‌سینی تکلیف ائتدی.
مکرون دونن ارمنیستان باشباخانی نیکول پاشینیانلا دا تلفندا دانیشمیشدی.