قازاقیستاندا اولوسال یاس اعلان ائدیلدی
اولوسال یاس گونو سببی ایله اؤلکه‌ده‌کی بوتون بایراقلار یارییا ائندیریلدی
قازاقیستانین آبای ایالتینده چیخان مئشه یانغینیندا حیاتینی ایتیره‌ن ۱۴ اورمان ایشچیسی اوچون بو گون "اولوسال یاس گونو" اعلان ائدیلدی.
اولوسال یاس گونو سببی ایله اؤلکه‌ده‌کی بوتون بایراقلار یارییا ائندیریلدی، تلویزیون و رادیوداکی اگله‌نجه و موسیقی پروگراملاری یاییندان قالدیریلدی، رسمی دؤولت قوروملاری ایله خبر سایتلارینین صحیفه‌لری قارا و آغا بوروندو.
قازاقیستان جمهورباشقانی قاسیم جؤمرد توکایئو، یانغینین سوردوگو آبای ایالتینده اولوشدورولان عاجیل قرارگاه‌دا مسئوللارلا توپلانتی گئرچکلشدیردی.
توکایئو، توپلانتیدا ایلگیلی باخانلیغین و ایالت والیلیگینین فاجعه‌نین اؤنله‌نمه‌سی قونوسون‌دا یئترلی سویه‌ده متشکل اولابیلمه‌دیکلرینی ایفاده ائتدی.
باش ساوچیلیق، یانغینلا باغلی سوروشدورما باشلادیلدیغینی بیلدیردی. اؤزل تجروبه‌لی ساوچیلارین وظیفه‌لندیریلدیگی سوروشدورما چرچیوه‌سینده مسئول قوروم و مقاملارین یانغینا دایر ائیلملرینه باغلی قانونی دگرلندیرمه ائدیلمه‌سی مقصدیله اهمال دعویسی آچیلدی.
یانغینین داوام ائتدیگی ۳ نقطه‌ده سؤندورمه ایشلری سوررکه‌ن والیلیک، یانغین سببی ایله آغیر توستونون تأثیرین‌ده قالان بؤلگه‌ده‌کی بعضی کندلرین بوشالدیلدیغینی بیلدیردی.
قازاقیستان فؤوق‌ا‌لعاده حاللار باخانی سریم شاریپحانوو، ژورنالیستلره وئردیگی آچیقلامادا، وضعیتین کنترل آلتین‌دا اولدوغونو آنجاق هاوا ایستیلیگینین آرتماسی و شدتلی کولک سببی ایله بؤلگه‌ده یئنی‌دن آلوولانما ریسکینین اولدوغونو سؤیله‌دی.
شاریپحانوو، بؤلگه‌ده یانغینا موداخیله اوچون یئترلی اینسان و تجهیزاتا صاحب اولدوقلارینی ایفاده ائتدی.
یانغینین تأثیرلی اولدوغو ساحه‌نین گئده‌رک کیچیلدیگینی بیلدیرن شاریپحانوو، "تخمینلریمیزه گؤره اؤنوموزده‌کی بیر نئچه گون‌ده یانغینی سؤندورجییک" بیلگیسینی پایلاشدی.
آبای ایالتین‌ده‌کی سمه‌ی اورمانیندا ۸ ژوئنده یانغین چیخمیش، آلوولارا ایلک موداخیله‌نی ائتدیکلری ایفاده ائدیله‌ن ۱۴ اورمان ایشچیسی حیاتینی ایتیرمیشدی.
ایلگیلی‌لی خبرلر
آذربایجان جمهوریتیندن رئیسی اوچون باش‌ساغلیغی
آذربایجان جمهورباشقانی ایلهام علییئو، ایران دینی لیدئری علی حامنه‌اییه باش‌ساغلیغی مئساژی گؤندردی
