جمهورباشقانی علییئو، لاورووو قبول ائتدی
علییئو، گونئی قافقازا باریشی گئری گتیرمک اوچون ارمنیستان طرفی و روسیا ایله یاپیچی ایشلر گؤرمهیه قرارلی اولدوقلارینی ایفاده ائتدی
آذربایجان جمهورباشقانی ایلهام علییئو، گونئی قافقازا باریشی گئری گتیرمک اوچون ارمنیستان طرفی و روسیا ایله یاپیچی ایشلر گؤرمهیه قرارلی اولدوقلارینی ایفاده ائتدی.
آذربایجان جمهورباشقانلیغیندان وئریلن آچیقلامایا گؤره، گؤروشمهلر گئچیرمک اوزره دونن باشکند باکییا گئدن روسیا خاریجی ایشلر باخانی سرگئی لاورووو قبول ائدن علییئو، لاورووون سفرینین ۲۲ فوریه ۲۰۲۲ده روسیا ایله آذربایجان آراسیندا ایمضالانان "متفیقلیک فعالیتلری حاقیندا بیاننامه"نین ایل دؤنومونه اتحاف ائدیلدیگینی دیله گتیردی.
جمهورباشقانی علییئو، روسیا ایله ایلیشکیلرینین گلیشدیگینی، چوخ اؤنملی قونولارین حل ائدیلدیگینی، بو ایله ده یاخشی بیر تملله باشلادیقلارینی، لاورووون سفرینین ایکی اؤلکه ایلیشکیلرینه اؤزل بیر دینامیک قازاندیراجاغینی ایفاده ائتدی.
۲۰۲۳ ایلینین آذربایجان ایله ارمنیستان آراسینداکی ایلیشکیلرین نورماللاشماسی یولوندا ایرلیلهمه ایلی اولماسینی آرزو ائدن علییئو، بو سۆرهجه آکتیو ایشتیراکی اوچون روسیا حکومتینه تشکر ائتدی.
روسیا دؤولت باشقانی ولادیمیر پوتینین روسیا ایله آذربایجان آراسینداکی متفیقلیک ایلیشکیلرینین گلیشمهسینه بؤیوک اؤنم وئردیگینی وورغولایان سرگئی لاوروو دا،
"بؤلگهسل گوونلیک، ایکیلی و چوخ طرفلی ایلیشکیلریمیزده اولدوقجا گۆنجل بیر مؤوضوع اولماغا داوام ائدیر. بو بؤلگهدن اوزاقدا اولانلار دا داخیل اولماق اوزره بیر چوخ اولوسلارآراسی مسلکداشیمیز، آذربایجان ایله ارمنیستان آراسینداکی ایلیشکیلرین نورماللاشماسی اوچون ایرلیلهمه شرطلرینین یارادیلماسینا بؤیوک ماراق گؤسترمکدهدیر. پوتینین دفعهلرله سؤیلهدیگی کیمی، وضعیتی ثابتلیگه قوووشدورماغی و بو بؤلگهدهکی بوتون اؤلکهلرین قارشیلیقلی سایغی تملینده امکداشلیق ائتمه فورصتینه صاحب اولمالاری اوچون شرطلر یاراتماغی آماجلایان بوتون چابالاری سئوینجله قارشیلاییریق" دگرلندیرمهسینی دیله گتیردی.