آکار: هر زامان جان آذربایجانین یانینداییق
"آذربایجان اوردوسو، تۆرکون گۆجونو بوتون دونیایا گؤستردی"
آذربایجان جمهورباشقانی ایلهام علییئو، میللی ساوونما باخانی حولوصی آکار و تۆرک سلاحلی گۆجلری قوموتانلارینی قبول ائتدی.
باشکند باکیدا جمهورباشقانلیغی ساراییندا گئرچکلشن قبولدا آکار، تۆرک دونیاسینین بؤیوک و بیلگه لیدئری حیدر علییئوین ایرلیاورتایا قویدوغو "بیر میللت، ایکی دؤولت" آنلاییشی ایله ایکی اؤلکه آراسینداکی قارداشلیغین داوام ائتدیگینی وورغولادی.
۳۰ ایللیک ایشغالی ۴۴ گون داوام ائدن وطن محاربهسی ایله سولاندیران آذربایجانین ظفر بایرامینی تبریک ائدن آکار:
"آذربایجان اوردوسو ۴۴ گون داوام ائدن وطن محاربهسی ایله ایشغال آلتینداکی تورپاقلارینی ایشغالدان آزاد ائتدی. ظفر الده ائدهبیلهجک گۆج، ایمکان و قابلیته صاحیب اولدوغونو، تۆرکون گۆجونو بوتون دونیایا گؤستردیلر" دئدی.
گلیشمهلری یاخیندان ایزلدیکلرینی بیلدیرهن آکار،
"آذربایجانلی قارداشلاریمیزلا امکداشلیغیمیزی داوام ائتدیریریک. حربی تعلیم ساحهسینده امکداشلیق و دانیشمانلیق ایله ساوونما صنایعینده نهلر ائدهبیلهجگیمیزی بیرلیکده چالیشیر و قرار وئریریک" ایفادهسینی ایشلتدی.
آذربایجان و تۆرکیهنین بیرلیکده اوزاتدیغی باریش الینین ارمنیستان طرفیندن باشا دوشولمهسی و لازیم اولان آددیملارین آتیلماسی ضرورتینی وورغولایان آکار، " بونون بؤلگه اوچون ده اؤنملی اولدوغونو، بو شکیلده قافقازلارین باریش و ثابیتلیک بؤلگهسینه چئوریلهبیلهجگینی باشدا ارمنیستان اولماقلا هامینین گؤرمهسی لازیم" دئدی.
میللی ساوونما باخانی آکار، داها سونرا آذربایجانلی قونومداشی ژنرال ذاکیر حسنوولا گؤروشدو.
حولوصی آکار، باش باشا و هیئتلرآراسی گؤروشلردن سونرا وئردیگی آچیقلامادا، ایکی اؤلکه آراسینداکی دوستلوق و قارداشلیغین "بیر میللت، ایکی دؤولت" آنلاییشی ایله ان یوکسک سویهده داوام ائتدیگینی بیلدیررک،
"تۆرکیه اولاراق ایندییه قدر اولدوغو کیمی بوندان سونرا دا آذربایجانلی قارداشلاریمیزلا بیر یومروق، بیر اورک اولماغا داوام ائدجییک. هر زامان جان آذربایجانین یانینداییق. آذربایجان هئچ واخت یالنیز دئییل" ایفادهسینی ایشلتدی.
حسنوو دا تۆرکیه و آذربایجان ساوونما باخانلیقلاری آراسیندا امکداشلیغین آرتاراق داوام ائتدیگینی وورغولایاراق، آکارا وئردیگی دستهگه گؤره تشکر ائتدی.
ایلگیلیلی خبرلر
آذربایجان جمهوریتیندن رئیسی اوچون باشساغلیغی
آذربایجان جمهورباشقانی ایلهام علییئو، ایران دینی لیدئری علی حامنهاییه باشساغلیغی مئساژی گؤندردی