اورمو گؤلو اوچون ماتم مارشی
"اورمو گؤلونون قوروماسینین، سمبولیک اولاراق آذربایجان خالقینین کولتور، دیل، اقتصاد و مدنیتینین قوروماسی دئمکدیر"
تبریزلی بستهکار و ائتنوموزیکولوگ آریا تورکانبوری، قوروماقدا اولان اورمو گؤلو اوچون "اورمو گؤلو اوچون ماتم مارشی" آدلی اثر بستهلهدی.
سؤزلری علیرضا قولونجویا عاید اولان مارش، هادی مصطفائی طرفیندن موغام طرزینده ایفا ائدیلمیشدیر.
تورکانبوری آنادولو آژانسینا وئردیگی مصاحیبهده، اورمو گؤلونون آذربایجان خالقینین سمبولو اولدوغونو بیلدیررک،
"بو گؤلون بؤیوک بیر بؤلومونون قوروماسی بوتون آذربایجان خالقینا، او جملهدن منه تأثیر ائتدی و بو مارشی اونا گؤره یازدیم" دئدی.
تورکانبورینین سؤزلرینه گؤره، ماتم مارشی اؤلوم اوچون یازیلان و داها چوخ باتی اؤلکهلرینده یاییغین اولان بیر موسیقی سبکیدیر.
"اورمو گؤلونون قوروماسینین، سمبولیک اولاراق آذربایجان خالقینین کولتور، دیل، اقتصاد و مدنیتینین قوروماسی دئمکدیر" دئین تبریزلی صنعتچی،
"اورمو گؤلونون اؤلومو هم ده بونلارین اؤلومودور و او بؤلگهنین و انیسانلارینین عمومی وضعیتینی گؤستریر. بو اثرین شعری هم ده او دیارین اینسانلارینین حالینین تصویریدیر. اصلینده گؤلون قوروماسی آچیق آیدین گؤرونور آنجاق قالان مسئلهلر آچیق اولسا دا بو شکیلده آیدین گؤرونمور" ایفادهلرینی ایشلتدی.
آریا تورکانبوری، داها اؤنجه قاراباغ و تبریز اوچون ده مارش بستهلهییب یایینلامیشدی.
اورمو گؤلونون قوروماسی پروسهسی ۱۹۷۰.جی ایللرین سونلاریندا باشلامیش سون ایللرده ایسه داها دا سرعتلهنمیشدیر. باتی آذربایجان بحران یؤنهتیمی ایدارهسی باش مودورونون سؤزلرینه گؤره، گؤلدهکی سویون یۆزده ۹۵ی قوروموشدور.
چئوره اوزمانلاری و چئورهچی فعاللار ایللردیر اورمو گؤلونون قوروماسی پروسهسی و میلیونلارجا اینسانین حیاتینی تهلوکه آلتینا آلان دوز فیرتیناسی احتیمالی ایله باغلی اویاریر.
آنادولو آژانسی
ایلگیلیلی خبرلر
آذربایجان جمهوریتیندن رئیسی اوچون باشساغلیغی
آذربایجان جمهورباشقانی ایلهام علییئو، ایران دینی لیدئری علی حامنهاییه باشساغلیغی مئساژی گؤندردی