آذربایجان و ایران آراسیندا حربی امکداشلیق مسئله‌لری مذاکیره اولوندو

ایران اسلام جمهوریتینده رسمی سفرده اولان آذربایجان جمهوریتی ساوونما باخانی ژنرال ذاکیر حسنوو بو اؤلکه‌نین ساوونما و سلاحلی گوجلره دستک باخانی ژنرال محمدرضا قرایی آشتیانی ایله گؤروشدو.

آذربایجان ساوونما باخانلیغیندان وئریلن آچیقلامادا، گؤروشمه‌دن اؤنجه ساوونما باخانی ژنرال حسنوو ایران اسلام جمهوریتی ساوونما و سلاحلی گوجلره دستک باخانلیغینین سرگی سالونوندا سرگیله‌نن مختلیف حربی محصوللاری اینجه‌له‌دی.

قوناقلاری ایراندا گؤرمکدن ممنونلوغونو ایفاده ائد‌ن قرایی آشتیانی ایکی اؤلکه خالقلاری آراسیندا دینی، تاریخی، مد‌نی ایلیشکیلرین دوستلوق عنعنه‌لرینه دایاندیغینی وورغولادی. ایرانلی باخان آیریجا، آذربایجان ایله ایران آراسیندا حربی امکداشلیغین گلیشمه‌سینین اؤنملی اولدوغونو بیلدیردی.

ژنرال حسنوو ایسه آذربایجان-ایران ایلیشکلرینین بؤیوک تاریخی اولدوغونو و ساغلام تمللر اوزرین‌ده قورولدوغونو دئدی. حسنوو، ایران اسلام جمهوریتینین ساوونما و سلاحلی گوجلره دستک باخانینی آذربایجانا رسمی سفره دعوت ائتدی.

گؤروشمه‌ده حربی امکداشلیغین گلیشدیریلمه‌سینده آذربایجان جمهوریتینین ساوونما باخانلیغی ایله ایران ایسلام جمهوریتینین ساوونما و سلاحلی گوجلره دستک باخانلیغی آراسیندا یارادیلمیش اورتاق چالیشما قروپونون فعالیتی، ائله‌جه ده ایکیلی آنلاشما اساسیندا حیاتا گئچیریله‌ن تدبیرلر یوکسک اولاراق دگرلندیریلدی.