علییئو: کیمسه بیزی دوردورابیلمز
آذربایجان جمهورباشقانی، سون دؤورده سالدیریلاری آرتان ایروان رهبرلیگینه سرت مئساژلار وئردی
آذربایجان جمهورباشقانی ایلهام علییئو، قاراباغ‌دا آتیشکسی پوزان ارمنیستانی تنقید ائتدی.
علییئو، اؤلکه مطبوعاتینا وئردیگی آچیقلامادا، سون دؤورده سالدیریلاری آرتان ایروان رهبرلیگینه سرت مئساژلار وئردی.
علییئو،
"ایمکانلارینین آرتدیغینی دوشونه‌بیلرلر یا دا هارادانسا آرتیق دستک آلابیلرلر اما اونوتمامالیلار کی ۲.جی قاراباغ ساواشیندا‌کی کیمی، کیم اونلارا کؤمک ائتسه ائتسین بیز ایسته‌دیگیمیزی آلاجاغییق و هئچ کیمسه بیزی دوردورابیلمز" ایفاده‌لرینی ایشلتدی.
بؤلگه‌ده نورماللاشما چابالارینا دا توخونان ایلهام علییئو، ۳+۳ فورماتین‌داکی ایلک گؤروشمه‌نین تانیشما ییغینجاغی کیمی گئچدیگینی ایفاده ائتدی.
علییئو، ایکینجی گؤروشمه‌دن اعتباراً ارتباط یوللارینین مذاکیره ائدیلمه‌سینی گؤزله‌دیکلرینی سؤیله‌دی.
جمهورباشقانی علییئو، ایروان رهبرلیگینین بو امکداشلیقدان فایدالانماسی اوچون اساسسیز ادعالارین‌دان وازگئچمه‌سی لازیم اولدوغونو دا بیلدیررک،
"بورادا بوتون اؤلکه‌لرین فایدالاناجاغی آچیق‌دیر. یالنیز ارمنیستان؛ آذربایجان، تورکیه و اسلام قارشیدی توتومونو بوراخمالیدیر. سونرا طبیعی کی ارمنیستان دا بو امکداشلیقدان فایدالانابیلر" دئیه دانیشدی.
آذربایجان جمهورباشقانی، ژورنالیستلرین مینسک قروپونون بوندان سونراکی ایشله‌وینه دایر سوالا ظارافاتلا جاواب وئردی:
"تخمین ائدره‌م اونلار ایندی یوبیل (فعالیتلری بیتیرمه تؤره‌نی) ائتمه‌یه حاضرلانیر" دئدی.
