توکایئو: باریش گوجو قازاقیستانی ترک ائتمهیه باشلایاجاق
کوللکتیو گوونلیک آنلاشماسی هؤرگوتو باریش گوجو عسگرلرینین ۲ گون سونرا مرحلهلی شکیلده قازاقیستانی ترک ائتمهیه باشلایاجاغی بیلدیریلدی
قازاقیستان جمهورباشقانی قاسم جؤمرت توکایئو، کوللکتیو گوونلیک آنلاشماسی هؤرگوتو باریش گوجو عسگرلرینین ۲ گوندن سونرا مرحلهلی شکیلده قازاقیستانی ترک ائتمهیه باشلایاجاغینی بیلدیردی.
توکایئو مجلسدهکی چیخیشیندا اؤلکهدهکی وضعیتله باغلی آچیقلامالار وئردی.
قازاقیستانا قارشی بیر ترور ساواشینین باشلاندیغینی بیلدیرهن توکایئو، تروریستلره قارشی عملیاتین ان چتین قیسمینین گئچدیگینی و وضعیتین ثابت حالا گلدیگینی بیلدیریدی.
توکایئو، اؤلکهدهکی وضعیته گؤره عضو اولدوقلاری کوللکتیو گوونلیک آنلاشماسی هؤرگوتوندن حربی یاردیم ایستهدیکلرینی خاطیرلاداراق،
"قازاقیستان، قانونی اولاراق کوللکتیو گوونلیک آنلاشماسی هؤرگوتو اورتاقلاریندان باریش گوجو طلب ائتدی. بو قرار وئریلدیگی سیرادا، آلماتی اوزریندهکی کنترلوموزو تامامیله ایتیرمک عرفهسینده ایدیک. آلماتینی ایتیرمیش اولسایدیق، باشکندی، سونرا ایسه بوتون اؤلکهنی ایتیرردیک" دئدی.
کوللکتیو گوونلیک آنلاشماسی هؤرگوتو باریش گوجونون گؤرهوینی اوغورلا باشا چاتدیردیغینی دئیهن توکایئو:
"کوللکتیو گوونلیک آنلاشماسی هؤرگوتو باریش گوجو ۲ گوندن سونرا تدریجاً قازاقیستانی ترک ائتمهیه باشلایاجاق، گئری چکیلمه مدتی ان چوخ ۱۰ گون اولاجاق" ایفادهلرینی ایشلتدی.
کوللکتیو گوونلیک آنلاشماسی هؤرگوتو، کوللکتیو گوونلیک شوراسینین قراری ایله قازاقیستانا ۲ مین ۳۰۰ عسگر و ۲۵۰تجهیزات گؤندرمیشدی.