"ارمنیستاندا تورکلره قارشی نیفرت دولو اوشاقلار یئتیشدیریلیر"
آذربایجان خاریجی ایشلر باخانی کؤمکچیسی، اولوسلارآراسی عدالت دیوانینین، آذربایجان و ارمنیستانین مراجعتلری ایله باغلی قرارینی دگرلندیردی
آذربایجان خاریجی ایشلر باخانی کؤمکچیسی ائلنور محمدوو ارمنیستانا، اولوسلارآراسی عدالت دیوانینین، "آذربایجانلیلارا قارشی ائتنیک آیریمچیلیق ائتمهسینه" باغلی قرارینی درحال ایجرا ائتمهیه چاغیردی.
محمدوو بیرلشمیش میللتلر تشکیلاتینین یارغی اورگانی اولان اولوسلارآراسی عدالت دیوانینین، آذربایجان و ارمنیستانین مراجعتلری ایله باغلی قرارینی دگرلندیردی.
آذربایجانین هر زامان اولوسلارآراسی قرارلارا باغلی قالدیغینی بیلدیرن محمدوو مدیوانین قراری ایله ارمنیستانین اولوسلارآراسی محکمهده آذربایجان علیهینه سرت قرارلار گؤزلهیهرک سیاسی پوئن قازانما جهدینین اوغورسوزلوقلا نتیجهلندیگینی وورغولادی.
محمدوو، دیوانین قرارلاری ایله ارمنیستاندا آذربایجانا قارشی نیفرت یاییلدیغینین اثبات ائدیلدیگینه دقت چکهرک:
"ارمنیستاندا بیر چوخ تشکیلات، او جملهدن داخلی ایشلر باخانلیغی سوسیال شبکهلرده آذربایجان و تورکلری دوشمن اولاراق گؤرهنلری و تورپاقلارینین گئری قایتاریلماسی اوچون کمپین یئریدنلری اؤدوللندیریر. آذربایجان بوتون بو دلیللرله اولوسلارآراسی محکمهیه شکایت ائتدی. نتیجهده محکمه بو دلیللری آراشدیردی و ارمنیستانی، بوتون بونلاری انگللمکله مکلف قیلدی" دئدی.
دیوانین اساس وظیفهسینین قظعنامهلرین یئرینه یئتیریلمهدیگی تقدیرده امنیت شوراسینین دقتینه چاتدیریلماسی اولدوغونو خاطیرلادان محمدوو، ارمنیستانین محکمهنین قرارلارینی ایجرا ائتمهدیگی تقدیرده جدی باسقیلارلا اوزلهشهجگینی بیلدیردی.
محمدوو،
"ارمنیستانی محکمهنین قرارینی تئز بیر زاماندا یئرینه یئتیرمهیه چاغیریریق. ارمنیستاندا تورکلره و آذربایجانلیلارا نیفرت دولو اوشاقلار یئتیشدیریلیر. بو، گلهجگی ماراقلاندیران بیر مسئلهدیر. اونا گؤره ده بونون قارشیسی آلینمالیدیر" دئدی.