ارمنیستان، قاراباغدا تاریخی آنیدلارین یوزده دوخسان بئشینی یوخ ائتدی

آذربایجانین مدنیت باخانی: قاراباغ یاخین گله‌جک‌ده آذربایجانین ان گؤزل بؤلگه‌لرین‌دن بیرینه چئوریله‌جک

1719654
ارمنیستان، قاراباغدا تاریخی آنیدلارین یوزده دوخسان بئشینی یوخ ائتدی

آذربایجانین مدنیت باخانی آنار کریموو ایشغال دؤورون‌ده ارمنیستانین قاراباغ‌دا و اطراف ایالتلرده آذربایجان‌لیلارا عاید تاریخی و مد‌نی عابده‌لرین یوزده ۹۵ینی یوخ ائتدیگینی بیلدیردی.

کئریموو آنادولو آژانسینا وئردیگی دیرله‌ندیرمه‌ده، ایشغال دؤورون‌ده ارمنیستانین بؤلگه‌ده‌کی آلت یاپی، تاریخ و مدنیت آنیدلارینا و حتی قبیریستان‌لیقلارا بؤیوک زیان ووردوغونو ایفاده ائد‌رک بو وضعیتی "ساواش سوچو" و "اینسانلیق سوچو" اولاراق تانیملادی.

کریموو ارمنیستانین آذربایجانا قارشی "ائتنیک تمیزلیک" سیاستینین یانی سیرا "کۆلتورل تمیزلیک" سیاستینی ده ۳۰ ایل بویونجا داوام ائتدیردیگینی بیلدیردی.

"بیر واختلار ایشغال ائدیلمیش تورپاقلاردا دؤولتده ثبت اولونموش ۷۰۶ تاریخ و مدنیت عابده‌سی وار ایدی. بو عابده‌لرین یوزده ۹۵ینین یوخ ائدیلدیگینی گؤردوک" دئدی.

اؤزللیکله مسجیدلره ائدیلن حؤرمت‌سیزلیگی بؤیوک کدرله قارشیلادیقلارینی بیلدیرن کریموو،

"مسجیدلریمیزده دونوز ساخلادیلار. بونو آذربایجان خالقینین دینی حسلرینی آلچالتماق اوچون بیله‌رک‌ ائتدیلر. بیز بونو تکجه آذربایجانا دئییل، بوتون ایسلام دونیاسینا حؤرمت‌سیزلیک کیمی دگرلندیریریک" دئدی.

آذربایجان حکومتینین اساس وظیفه‌سینین ایشغال‌دان قورتاریلمیش بؤلگه‌لری یئنی‌دن قورماق و جانلاندیرماق اولدوغونو دئیه‌ن کریموو، قاراباغین یاخین گله‌جک‌ده آذربایجانین ان گؤزل بؤلگه‌لرین‌دن بیرینه چئوریله‌جگینی سؤیله‌دی.

کریموو ارمنیستانین آذربایجان اتورپاقلاریندا تؤرتدیگی ییخیملارین اولوسلارآراسی محکمه‌لره آپاریلماسی اوچون چالیشدیقلارینی و ارمنیستانین دؤولت اولاراق بو قونودا یارغیلانماسینی و خسارت اؤد‌مه‌سینی ایسته‌دیکلرینی ایفاده ائتدی.



ایلگیلی‌لی خبرلر