علییئودن ایرانا تپکی
"بو یاخینلاردا ایرانین هانسی‌سا ایالت موللاسی آغزینی آچیب آذربایجانا قارشی ایفتیرالار اویدوراندا بیز بونا فیکیر وئرمه‌دیک. اما سونرا، رسمی شخصلر بیزه قارشی اساس‌سیز اتهاملار ایر‌لی سورمه‌یه باشلامیشلار"
آذربایجان پرزیدنتی ایلهام علییئو ایشغال‌دان قورتاریلیشینین ایلک ایلینده زیارت ائتدیگی جبراییل شهرین‌ده بعضی وطنداشلار ایله گؤروشدو.
ارمنیستان حاقین‌دا دانیشان علییئو، ارمنی توپلومونون گرچک وضعیتی دوزگون تحلیل ائتمه‌لی اولدوغونو ایفاده ائدرک، "آرتیق بؤیوک ارمنیستان خیالین‌دان ال چکمه‌لیدیرلر. دنیزدن دنیزه میتولوژیک ارمنیستان خیالین‌دان واز گئچمه‌لیدیرلر. آذربایجان و تورکیه‌یه قارشی تورپاق ادعالارین‌دان ال چکمه‌لیدیرلر. باشقا یول یوخدور" دئدی.
علییئو، تورکیه پرزیدنتی رجب طیب اردوغانین تکلیف ائتدیگی ۶لی امکداش‌لیق پلتفورمونا آذربایجانین ایلک اؤلکه اولاراق دستکله‌دیگینی قید ائدرک، "اگر بوندان بیریلری راضی دئییلسه، بیزیم ده بو پلتفورما احتیاجیمیز یوخدور. بیلیرم کی، بعضی اینسانلار بوندان راحاتسیزدیرلار. بعضیلری پروسه‌دن کناردا قالدیقلارینی دوشونورلر. بو، اونلارین اؤز ایشلری‌دیر. بیز بوتون قونشو اؤلکه‌لره امکداش‌لیق اوچون بیر پلتفورم تکلیف ائتدیک" ایفاده‌لرینی ایشلتدی.
"بؤلگه‌ده ثابیتلیگین تامین اولونماسین‌دا تورکیه و روسیانین بؤیوک رولو وار"
تورکیه و روسیانین بؤلگه‌ده‌کی فعالیتین‌دن دانیشان علییئو بئله دئدی:
"بو گون بؤلگه‌ده ثابیتلیین تامین ائدیلمه‌سین‌ده تورکیه و روسیانین بؤیوک رولو وار. اونا گؤره ده بو فورمات بیزیم اوچون کیفایت‌دیر. باشقا یول اولمادیغی اوچون ارمنیستان دا بو فورماتا قوشولاجاق. حاضیرکی گرچکلیک بودور. تورکیه ایله ارمنیستان آراسین‌داکی ایلیشکیلرین نورماللاشماسی ایله باغلی سون واختلار سسلندیریلن آچیقلامالاری بیز ده دستکله‌ییریک. ایندی بؤلگه‌ده عملی امکداش‌لیق اوچون چرچیوه معین ائدیلیر. تورکیه ایله روسیا آراسین‌داکی امکداش‌لیق بؤلگه‌میزده ثابیتلیگین ضمانتی‌دیر. تورکیه و روسیا پرزیدنتلرینین سون گؤروشون‌ده، آذربایجان – ارمنیستان ایلیشکیلری ده مذاکیره ائدیلدی. هم تورکیه، هم ده روسیا ایله دائم تماسداییق. من پرزیدنت اولاراق دائما تماسدایام. هر جور ساواش ریسکینی اورتادان قالدیرماق لازیم‌دیر. تورکیه-روسیا-آذربایجان-ارمنیستان فورماتی بیزه یئتر. قاتیلماق ایسته‌ین قاتیلار، قاتیلماق ایسته‌مه‌ین اؤزو بیلر. هر حال‌دا بو گون آذربایجانین راضی‌لیغی اولمادان بؤلگه‌ده هئچ بیر گیریشیم گرچکلشیدیرله‌بیلمز. بونو هامی بیلمه‌لی‌دیر ".
علییئو ایرانلا سون زامانلار یاشانان گرگین‌لیکله باغلی ایسه بئله دئدی:
"بیز خوش نیت گؤستریریک. اما او دئمک دئییل کی، بیز اؤزوموزه قارشی اساس‌سیز اتهاملاری قبول ائدجییک. من بونو بورادا – جبراییل‌دا، باخ، بورادا آراز چایینین کنارین‌دا دئییرم، آذربایجان خالقینا و بوتون دونیایا، بیزه قارشی اساس‌سیز اتهاملار جاواب‌سیز قالمایاجاق.
بیز بو اتهاملاری رد ائدیریک، قبول ائتمیریک و ثبوتلار طلب ائدیریک. بو یاخینلاردا ایرانین هانسی‌سا ایالت موللاسی آغزینی آچیب آذربایجانا قارشی ایفتیرالار اویدوراندا بیز بونا فیکیر وئرمه‌دیک. اما سونرا، افسوسلار اولسون کی، رسمی شخصلر بیزه قارشی اساس‌سیز اتهاملار ایر‌لی سورمه‌یه باشلامیشلار.
گویا کی، آذربایجان بو بؤلگه‌لره اسرائیلی گتیریب. گؤزلرینی آچسینلار، گؤرسونلر. بونلار اسرائیلی بورادا هارادا گؤروبلر؟! بورادا بیر آدام دا یاشامیر. بورادا بیر بینا دا یوخدور. ثبوتلار وار؟ یوخ. ثبوتلار یوخدورسا، هر کس گرک دئدیگی سؤزلره گؤره مسئولیت داشیسین. بیز ایمکان وئره‌بیلمریک کی، بیزه قارشی کیمسه اساس‌سیز ایفتیرا اویدورسون".
"هئچ کیم ایشیمیزه قاریشمامالی‌دیر"
آذربایجانین موستقیل سیاست یئریدن بیر اؤلکه اولدوغونو وورغولایان علییئو:
"بونو هر کس بیلیر و بیرینجی ایل دئییل کی، موستقیل سیاست آپاریریق. قونشولاریمیزلا، بوتون باشقا اؤلکه‌لرله موستقیل سیاست اثناسین‌دا موناسیبتلر قوروروق. هئچ کیم بیزیم داخیلی ایشیمیزه قاریشماسین.
بیز هانسی اؤلکه ایله هانسی سویه‌ده موناسیبتلر قوروروق، بیزیم اؤز ایشیمیزدیر. بیز آخی ارمنیستان ایله سیخ دوستلوق علاقه‌لری اولان اؤلکه‌لره قارشی ادعا قالدیرمیریق. گؤرون، ارمنیستانین نه قدر هاواداری وار. ایکینجی قاراباغ محاربه‌سی بونو گؤستردی و بو گون، گؤرون، ارمنیستانی دستکله‌یه‌ن نه قدر اؤلکه وار. یعنی، بیز بو اؤلکه‌لرله دوشمن اولاق؟ یوخ. بو، اؤلکه‌لرین اگمن حقوقونو بیز قبول ائدیریک. هاراداسا داخیلی عالمیمیزده بوندان ناراحات اولا بیلریک، بیزی اینجیده بیلر، خصوصیله یاخین اولان اؤلکه‌لر ارمنیستانلا موناسیبتلرده خصوصی جانفشانلیق ائد‌نده. اما بیز بونو هئچ واخت دیله گتیرمیریک. بیز هر بیر اؤلکه‌نین اگمن حقوقلارینا حؤرمتله یاناشیریق. طلب ائدیریک کی، بیزیم اگمن حقوقلاریمیزا هر کس حؤرمتله یاناشسین، بیزیم داخیلی ایشلریمیزه موداخیله ائتمه‌سین. بئله جهدلر اوللر ده اولوب، اونلارین هامیسی اوغورسوز اولوب. بیر داها دئمک ایسته‌ییرم، رسمی قایدادا بیزه قارشی سسله‌ندیریله‌ن اتهاملار ثبوتا یئتیریلمه‌لی‌دیر. گلسینلر تاپسینلار، بیر خاریجی وطنداش وار بو بؤلگه‌ده؟".
ایرانلا ۱۳۰ کیلومترلیک سرحدلرینی ارمنی قوه‌لرین‌دن تمیزله‌دیکلرینی خاطیرلادان علییئو، "ایشغال دؤورون‌ده اورادا باش وئره‌نلر آراشدیریلمالی‌دیر. حاضردا آراشدیریریق. آذربایجانی بورا باشقا بیر اؤلکه‌نی گتیرمکله سوچلاییرلار. گویا، آذربایجانی، آذربایجان دؤولتی و خالقی دئییل، خاریجی گوجلر ایداره ائدیر. بو بیزه قارشی حؤرمت‌سیزلیک‌دیر. بیز بونو هئچ واخت قبول ائده بیلمریک. بونو هامی بیلمه‌لی‌دیر. آذربایجان، خاریجی ایلیشکیلرینی و ایچ ایشلرینی اؤز بیلدیگی شکیلده پلانلاشدیرماغا داوام ائد‌جک. هئچ کیم ایشیمیزه قارشیماسین" ایفاده‌لرینی ایشلتدی.
ایلگیلی‌لی خبرلر
آذربایجان جمهوریتیندن رئیسی اوچون باش‌ساغلیغی
آذربایجان جمهورباشقانی ایلهام علییئو، ایران دینی لیدئری علی حامنه‌اییه باش‌ساغلیغی مئساژی گؤندردی
