دوکتور محمدحسین مُبیین‌ین ایل دؤنومودور
مبیین جوذاملی خسته‌لرین تکجه دوکتورو دئییل اونلارین آتاسی، یولداشی، شاعیری و سؤزچوسو ایدی
ابراهیم ساوالان:
مهرین آلتیسی دوکتور محمدحسین مُبیین یا هامان شاعیر شیمشک‌ین ایل دؤنومودور و بیز بیرداها او توکنمز خزینه‌نی یاد ائدیریک. اما ساده‌جه یاد ائدیریک، چونکو 62 ایل گئجه‌لی گوندوزلو چالیشمانی، نئچه سطیره سیغدیرماق اولارمی هئچ؟
هله بو هاراسیدیر، محمدحسین قابل‌نژاد جنابلاری‌نین چالیشمالاری نتیجه‌سینده دوکتور مُبیین حاقدا حاضیرلانمیش 1400 صفخه‌لیک کیتاب دا او دنیزین بیر دامجیسی‌دیر منجه. آما هئچ اولماسا، یئنه ده آذربایجانین او ابدی افتخارینی یاد ائتمک بیزیم بورجوموزدور بوگون.
مبیین جوذاملی خسته‌لرین تکجه دوکتورو دئییل اونلارین آتاسی، یولداشی، شاعیری و سؤزچوسو ایدی. او هر فرصتدن فایدالانیب جوذاملی سارالارین دردینی دیللره سالیردی. او 1343ون قیشیندا همه‌شه یاشار صمد بهرنگی‌نی اؤزو ایله باباباغینا آپاردی و صمد نئچه گئجه گوندوز اوردا خسته‌لرله قالیب گؤردوکلرینی و خسته‌لرین دردلرینی قلمه آلدی. صمدین یازیلاری اون نومره‌ده کیهان روزنامه‌سینده یاییلدی. شاعیر شیمشک اوتوز ایل تامام هر ایل بهمن‌ین سککیزینده حسن دمیرچی‌نی باباباغینا چاغیردی و حسن دمیرچی‌نین تاری و خواننده‌لرین سسی او خسته‌لری شنلندیردی. او اؤلمز اینسان بعضی گئجه‌لری سحره‌دک خسته‌لرین باشی اوسته اوتوروب اونلارا شعر قوشموشدو:
دونیا اونوتسا دا منی
من سنی آتمارام بالا
یوخلاسا دونیانی گؤزو
بیرگئجه یاتمارام بالا.
شاعیر شیمشک ده چوخلاری کیمی گنج چاغلاریندا فارسجا شعرلر یازمیشدی آما دموکرات فرقه‌سیندن ائتکی‌له‌نرک عؤمرونون قالانینی اؤز دوغما دیلینده یازدی. او همه‌شه آذربایجان میللی حکومتیندن دانیشاندا «دئموکراتیک حکومتیمیز» دئییب اؤیرنجی‌لیک گونلرینی بئله یاد ائدردی: «دئموکراتیک حکومتیمیز گئدندن سونرا بیر طرفدن مخالیفلر دانشگاها هوجوم ائدیب اورانی تالان ائتمک ایسته‌ییردیلر باشقا طرفدن باشدا اوتورانلار دوکتورلوق فاکولته‌سینی آذربایجاندا آرادان آپارماق ایسته‌ییردیلر؛ آما اؤیرنجی‌لر هر گئجه کئشیک وئریب فاکولته‌نی تالاندان قورودولار اونلار حتتا گئدیب مجلیس قاباغیندا تحصن ائدیب تبریز یونیورسیته‌سینی ساخلادیلار».
دوکتور مبیین عزیز دوستو شهریارین خاطیره‌سینه یازدیغی کیتابیندا بئله یازیر: شهریار «آنام تبریز»، «آنام قفقاز»ی عنوان ائتمکله آیدینجا بیلدیریر، وطن عشقینده یانانلارا، وطن دردیله اودلانانلارا، عشق و وفا اهلینه «اوتای»، «بوتای» یوخدور و محبت عالمینده اورکلر بیر اودلا یانار، بیر اودلا آلیشارلار.
ایلگیلی‌لی خبرلر
قازاخیستان-دا داشقین‌لاردان سونرا 54،7 مین نفر ائولرینه قاییدیب
بو باره‌ده فوق العاده حال‌لار ناظیرلیگی‌نین مطبوعات خیدمتی معلومات یاییب.
