ادبیّات سمامیزدان باشقا بیر اولدوز آخدی - حسن راشدی
ناظر شرفخانهای تخلّصی ایله تانینمیش شاعیر محمد رضا ملکپور وفات ائتدی
« ناظر شرفحانهای»میزده اوچوب گئتدی...!
بوگون سه شنبه ۱۶ شهریور ۱۴۰۰ ساعات اون ایکی اولمامیشدی جیب تئلفونوم زنگ چالدی، کرجده یاشایان همیشه کی دوستوموزون آدی تئلفوندا گلدیکده سئوینهرک تئلفونا جاواب وئردیم.
آمما بو سئوینمک نئچه ثانیهدن چوخ چکمهدی، چونکو دوستوموز بیر آجی خبری منه چاتدیردی!
«اوستاد ناظر شرفخانهای وفات ائتدی!»
نه زامان وفات ائتدیگینی سورشدوغومدا، «ائله ایندی ...» دئمهیه اکتفا ائتدی ...!
آخ ...! بئله بیر زاماندا و کورونا شرایطینده، وطن یولوندا چالیشان، وطن سئوگیسی ایله اورهیی چیرپینیب و وطن سئوداسی ایله یاشاییب- یارادان اینسانلاریمیزین وفاتی زامانی دفن و عزا مراسیمینده شرکت ائده بیلمهمهییمیز، بیزه داها چوخ نیسگیل اولوب!
اوستاد «محمد رضا ملکپور»، «ناظر شرفخانهای» تخلّصی ایله تانینمیش مهارتلی و اینجه دویغولو قوجامان شاعیریمیز ۱۳۱۷ هجری گونش ایلی اورمیه دریاچهسینین شرق طرفی «شرفخانه» شهرینده دونیایا گؤز آچمیش، ابتدایی تحصیلینی دوغولدوغو منطقهده اوخویوب، ۴ ایل تبریزده مقدماتی و ۱۱ ایله یاخین قوم شهرینده سطح و خارج طلبهلیک درسیندن علاوه تهران بیلیم یوردوندا یوکسک لیسانس مقطعینده تحصیل آلمیش و اوردان فارغ التحصیل اولموشدور و بیر نئچه ایل کرجین «اسلامی آزاد دانشگاه»یندا حقوق بؤلومونده تدریس ائتمیشدیر.
او، اوزون ایللر ایدی کرجده یاشاییر و ۵۸ جی نومره لی « ازدواج - طلاق» دفترخاناسینی اداره ائتدیکدن علاوه کرجین ادبی محفیللرینده اشتراک ائدیردی.
اوستاد ناظر اوزون ایللر بویو دیلیمیز و ادبیاتیمیز یولوندا زحمت چکمیش و آنا دیلیمیزده اؤزوندن ۶ جیلد شعر، حیکایه (اولدوزلو دَنیز، شئهلی سَحَر، ماهنیلیچای، «حیکایهلر،طنزلر و یئنی غزللر»، اورهک چیرپینتیسی و «تورکجه دیوان» ) اثرلرینی یادگار قویموشدور .
درین دویغولو و آذربایجانا باغلی اینسان،کرج محفلیمیزین آغ ساققالی و بَزَگی ایدی، ادبی مجلیسلریمیزده اولاندا، هر زامان اوندان « اورمو دریاچهسی» شعرینین اوخوماسینی تقاضا ائتدیکده، اؤزل بیر احساسلا اوخویاردی، یقین کی، اورمو دریاچهسی اونا دایاناقلی و چالیشقان ملّتینین سیمگهسی ایدی:
«اورمو دریاچهسی! توفانلی دنیزلر باشیسان سن،
پارلایان تاج طبیعتده بیریلیان قاشیسان سن،
دوزلو، ایستَکلی، ماراقلی دره، داغ یولداشیسان سن،
دریالار سنگِ صبور اولسا، دَییرمان داشیسان سن،
سنی توفان ییخا بیلمَز؛
سنه هیچ کیم چیخا بیلمز؛
سنه یئل، سئل باتا بیلمَز؛
سنی کؤنلوم آتا بیلمز...!