وارسان دئيه - سیامک میرزایی
بۆتۆن چیزیملردن اۆزۆنتۆلری سیلمک ایستهمیشدی اوْیسا اؤزۆ آجيلارين تؤكنمهين قايناغيدى
بوْغازيندان داغ دؤشۆنده چاغلایان، سرین چایلارا، درین سسسیزلیکده اویویان، گؤلتلهره اوچوشوردو. ائکیز شام آغاجلارینی آلما بوداغیندان شاشقینجاسینا ایزلردی و زیل سسی ایله یانیق بیر ماهنینی سسلردی.
قالابالیق مئشه لرین قوْل قیچیندا اوْینایاردی، گیزلهنه ردی، تاپیلاردی، گئنیش - گئنیش گۆلۆشلرین قوجاغیندا اوزاناردی.
بیر گۆن پیچاقلی آلمانین گؤی اۆزۆنه توللانديقدا ياغيش ياغاجاغينا اينانميشدى بير گۆن ایسه یالنیز اۆرهک تانیشی ایلا بیرگه سئوگی قاچیشلارینا یانان گؤزلرينه ياغيش ياغاجاقدى، اوْت خالچاسیندان شوْر گؤلۆ ايزلركن.
هله ده يئر قويودا ياشانان گؤزسۆز آنلارينى اونودماميشدى.
زامان يارپاقلانینجا گاه گۆیهريب گاه دا سوْلوردو و دۆنیانین بیر آن دوراقساییب تؤشكۆنۆ دردييینى گؤرۆردۆ.
نفسلرى قارالديقدا آرازا باخان كۆچهیه یوْللانیردی و شوملانان توْرپاقلارین ایستی نفسیندن آراز چایلاغینین گؤى سرينلييينه سريليردى.
اوجقار بير اوجاليغين باشيندايدى تک باشينا، ايسسيز يئرده بوْشلوغون درينليیينه وارميشدى و يوْخلوغون اؤلۆم يانينادک اوزانميشدى.
قيسير وارليغى، بيردن بيره تؤكۆلۆب بوْشالماسينى گؤرمۆشدۆ دويوم ايستک، آرزى و نفس چکیب دیری قالماغین یوْخ اوْلماسینا تانیق اوْلدو. اوجالارکن آلچالیردی کؤورهليب هؤنكۆر- هؤنكۆر بؤيۆردۆ. ياشام قاورامينين بيلينمزليک بايرامينا سانكى آغى دوْلو بير بارداق ايدى. آغريلارين اوغولدايان آغىسيندا. دؤنهلرجه دۆنيا باشينا اوچاركن يئنى دۆنيا آختاريردى اوزاقلاردا گؤرۆنمز بيلينمزلرده، بلكه ده لاپ یاخینلاردا گؤز اؤنۆنده قورولاجاقدى اوْ سئوديیى دۆنيا.
يوْل باشيندا ايدى كؤورک دويغولارى و مينلرجه قيش باخيشلاریندان اوْغورلانيب گیزلهنردی یاشام بوْیاسیندان قوْوولموش کیمی ایدی هر شئی دن قاچیب بیر گیزلین یئرده یارالی آرزولارینی قوْورولاراق سیغاللاییردی بۆتۆن چیزیم لردن اۆزۆنتۆلری سیلمک ایسته میشدی اوْیسا اؤزۆ آجيلارين تؤكنمه ين قايناغيدى. نئچه دؤنه سئوديينى نئچه دؤنه سئويلديينى آنلامازدى.
اوشاق اوْينون گۆلۆشلرینی بیر بوغچادا بوراخیب دا ایری - ایری اوْیونلارا قاتیلمیشدی. کسیم - کسیم یوْلداشلاری دییشمیشدی هر آلاندا چابالارکن و سوْنوندا اوْیون بیزیم اوْیونچو بیز، باخیجی بیز سؤيله ميشدى.
چلیشکیلر ساران ایستکلرین چاخناشماسیندان یاشام آنلامینی ایزلردی. کۆسدۆن سه دۆنیا ایله کۆسه جهیه مین نه اوْلدوغونو آخسارکن یاشامیشدی یاشامین گؤز اؤنۆنده ايتيردييى يوْخ ائتديیى آجيديغى سئوينديیى آنلارينا توْخوندوقجا آنلاميشدى، وارسان دئيه وارام سئوديم سه ياشارام و ياشام دئدييين یالنیز بو ایمیش.
سیامک میرزایی
ائوین زیندانی ۱۴۰۰/۰۴/۱۳